Каннаваро: Ўзбекистон терма жамоаси ақлли футболчиларга эга
Эронга қарши ўйиндан кейин Фабио Каннаваро жамоа руҳи, ўйинчиларнинг менталитети ва келаси йиғинларда амалга ошириладиган ўзгаришлар ҳақида батафсил фикр билдирди.
Ўзбекистон миллий терма жамоаси бош мураббийи Фабио Каннаваро Эронга қарши ўтказилган баҳсдан сўнг жамоанинг ўйини, футболчиларнинг ҳолати ва келгуси режалар ҳақида фикр алмашди. Унинг таъкидлашича, жамоа бир киши кам бўлиб қолганига қарамай, рақибга имконият қолдирмагани муҳим кўрсаткич бўлган.
Каннаваро Эронни Осиёдаги энг кучли термалардан бири сифатида эътироф этиб, бундай рақибга қарши ҳар бир эпизодда концентрация талаб этилишини қайд этди. Унга кўра, биринчи бўлимда назорат ўзбек футболчилари қўлида бўлиб, бир нечта вазият гол билан якунланиши мумкин бўлган. Иккинчи бўлимда эса мураббий гол урмаса ўйин қийинлашиб боришини, лекин ўйинчилар вазиятдан яхши чиқиб кетганини таъкидлади.
«Албатта, қизил карточкадан кейин ўйин оғирлашди, лекин мен ўйинчиларимнинг менталитетидан мамнунман. Бир киши кам бўлсак ҳам рақибга имконият қолдирмадик. Айтиб ўтганимдек, Эрон Осиёдаги энг кучли терма жамоалардан бири, уларда яхши штаб ишлайди. Футболчиларимиз қизил карточкадан кейин бир жамоа бўлиб ўйнашди. Бундай рақибга қарши битта кам ўйнаш осон эмас», — деди Каннаваро.
У ўйин услуби ҳақида гапирар экан, ҳимоядан тўғри чиқиш, прессинг ва балансни сақлаш бўйича иш олиб борилаётганини айтди. Каннаваро ўзини омадли мураббий деб атаб, бунга сабаб сифатида футболчиларнинг ақлли ва машғулотларга нисбатан ижобий муносабатини келтирди. Жамоадаги ички муҳит ҳам уни қониқтираётганини қўшимча қилди.
Мураббий жамоага нутритсолог жалб этилиши ҳақида ҳам тўхталиб, унинг вазифаси таом сифати ва спортчининг кундалик овқатланишини тўғри йўлга қўйиш эканини таъкидлади. Унга кўра, бундай майда деталлар катта натижаларга таъсир кўрсатиши мумкин. Пенальтилар серияси бўйича алоҳида машғулот ўтказилгани, тўпни ким яхши тепиши таҳлил қилингани ҳам қайд этилди.
Каннаваро жамоадаги айрим ўйинчилар ҳақида ҳам фикр билдирди. Хусусан, Остон Ўруновнинг потенциали юқори эканини, аммо барқарорликка эришиши зарурлигини айтди.
«Жалолиддин Машарипов билан гаплашдим. У югуришни бошлади. Бу турнирга келишга деярли тайёр эди. Умид қиламанки, март ойидаги йиғинимизда қатнашади. У клуби билан январдан машғулотларни бошлайди. Март ойида барча ўйинчиларим етиб келади деб умид қиламан. Йиғин бошидан буён 9 нафар, кейин 3 нафар футболчи йўқ бўлди — бу терма жамоаларда нормал ҳолат», — деди терма жамоа мураббийи.
ФИФА кунларидан ташқари йиғин ҳақида гапирар экан, Каннаваро январь ойида маҳаллий футболчилар иштирокида йиғин ўтказилиши режалаштирилганини маълум қилди.
«Таркибимизнинг катта қисми легионерлардан иборат, лекин бошқа номларни ҳам синаб кўрамиз. Ёшларга имконият берамиз. Бизга барча футболчилар керак», — деди Каннаваро.
Эслатиб ўтамиз, Ўзбекистон U17 термаси бош мураббийи Исломбек Исмоилов жаҳон чемпионатидаги мағлубиятдан кейин жамоа билан 3 йиллик фаолиятини расман якунлаганини эълон қилган эди.
