«Labubu» ишлаб чиқарувчисининг акциялари кескин тушиб кетди

Ҳонгконг биржасида рўйхатдан ўтган коллекцион «blind box» ўйинчоқлари ишлаб чиқарувчиси, жумладан вирусга айланган, тишлари кўринган «Labubu» персонажи билан машҳур «Pop Mart International Group» (9992.HK) компанияси акциялари 2025-йил молиявий натижаларини эълон қилгандан сўнг бугун, 25-март куни қарийб бир йилдаги энг катта пасайишни бошдан кечирди. Бу ҳақда «Reuters» хабар берди.

Тушдан кейинги савдоларда «Pop Mart» акциялари 20 фоиздан ортиқ арзонлашди. Пекинда жойлашган компания маълум қилишича, 2025-йилда даромад йилма-йил 185 фоизга ўсиб, 37,12 миллиард юанга (5,38 миллиард доллар) етган.

Хатарлар ҳали юқори

«Morningstar» таҳлилчиси Жефф Жаннинг айтишича, йиллик даромад ва фойда ўсиши таҳлилчиларнинг умумий прогнозларидан паст бўлган. Айниқса, тўртинчи чоракда ўсиш суръатининг сезиларли секинлашгани инвесторларда асосий интеллектуал мулк (IP)ларнинг барқарорлигига оид хавотирларни кучайтирган.

«2025-йилда дивиденд тўлови улушининг 35 фоиздан 25 фоизгача қисқариши ҳам бизнингча салбий омил», – дейди Жан.

Унинг таъкидлашича, «Pop Mart» лицензия бизнеси ва тематик парклар йўналишини ҳам кенгайтирмоқда, аммо бу соҳаларда ижро хатарлари ҳали ҳам юқори.

Маҳсулот тури кенгаяди

Компания раиси ва бош ижрочи директори Ван Нин эса 2026-йилда даромад камида 20 фоизга ўсишини кутаётганини билдирди.

«Биз фойдалилик ҳисобига даромадни оширадиган ўта агрессив ўсишни кўзламаймиз», – деди Ван таҳлилчилар ва инвесторлар билан ўтказилган ҳисоботдан кейинги мулоқотда.

Компаниянинг маълум қилишича, у маҳсулот турларини кенгайтиришни давом эттиради, жумладан маиший техника йўналиши ҳам қўшилади ва бу маҳсулотлар келаси ойда тақдим этилиши кутилмоқда. Шунингдек, раҳбариятга кўра, Пекиндаги тематик паркни кенгайтириш лойиҳаси ёз фаслида очилиши режалаштирилган.

Плюш ўйинчоқлар, сумка безаклари ва машҳур интеллектуал мулклар – «The Monsters» (жумладан «Labubu»), «Molly» ва «Crybaby» каби коллекцион маҳсулотларга бўлган глобал талаб тўлқини фонида «Pop Mart» маҳаллий «blind box» сотувчисидан мамлакатда энг кўп кузатиладиган истеъмол брендларидан бирига айланди. Компания ушбу оммалашув тўлқинидан фойдаланиб, хорижий бозорларга кенгайишни давом эттирмоқда.

Халқаро бозордаги ўринни кенгайтириш

Компаниянинг 2025-йилдаги даромади бир йил олдинги 13,04 миллиард юандан қарийб уч баравар ошиб, 37,12 миллиард юанга етди. Соф фойда эса 3,13 миллиард юандан 12,78 миллиард юангача ўсиб, 308 фоизга ошди.

Январ ойида компания Мексика, Камбожа ва Индонезияда ишлаб чиқариш қувватларини кенгайтирганини маълум қилди, бу талабни қондириш ва таъминот занжири барқарорлигини мустаҳкамлашга қаратилган.

Шунингдек, компания Лондонни Европадаги штаб-квартирасига айлантиришни режалаштирмоқда ҳамда «Labubu» ҳақида филм ишлаб чиқиш учун «Sony Pictures» билан ҳамкорликни йўлга қўйган. Бу эса унинг халқаро бозорларда янада фаол кенгайишга интилаётганини кўрсатади.