«Лукойл» хорижий активларини Gunvor Group’га сотмоқда
Россиянинг йирик нефт корпорацияси «Лукойл» хорижий активларини Швейтсарияда жойлашган Gunvor Group компаниясига сотиш бўйича дастлабки келишувга эришди.
«Лукойл» ўзининг халқаро активларига эгалик қилувчи LUKOIL International GmbH компаниясини сотиш бўйича Gunvor Group компаниясидан расмий таклиф олиб, сотиш бўйича дастлабки келишувга эришган. Бу ҳақда корпорация расмий сайтида маълум қилинди.
Компания баёнотига кўра, битимнинг асосий шартлари томонлар ўртасида аввалроқ келишилган. «Лукойл» мазкур таклифни қабул қилиб, бошқа эҳтимолий харидорлар билан музокаралар олиб бормаслик мажбуриятини олган.
Битимнинг амалга ошиши бир қатор шартларга боғлиқ бўлиб, жумладан, Gunvor томонидан АҚШ Молия вазирлигининг Хорижий активларни назорат қилиш бошқармаси (OFAC) рухсатини олиш талаб этилади. Шунингдек, бошқа хорижий юрисдикцияларда зарур бўлган лицензия ва рухсатномалар ҳам олиниши лозим бўлади.
«Лукойл» баёнотида айтилишича, агар зарур бўлса, томонлар битим якунлангунга қадар халқаро активлар ва уларнинг банк хизматларини узлуксиз таъминлаш мақсадида амалдаги OFAC лицензияларини узайтириш бўйича мурожаат қилишни режалаштирмоқда.
Компания таъкидлаганидек, LUKOIL International GmbH сотилиши бир қатор давлатлар томонидан «Лукойл» ва унинг шўба корхоналарига нисбатан жорий этилган чеклов чоралари билан боғлиқдир. Бу қарор компаниянинг халқаро фаолиятини санкциялар таъсиридан ҳимоя қилиш ва молиявий хавфларни камайтириш мақсадини кўзлайди.
Gunvor Group 2000 йилда россиялик бизнесмен Геннадий Тимченко ва швед ҳамкори Торберн Торнквист томонидан ташкил этилган. Компания ҳозирда дунёдаги энг йирик энергия трейдерларидан бири ҳисобланади. Тимченко 2014 йилда санкциялар таҳдиди сабаб ўз улушининг 44 фоизини шеригига сотган эди.
«Лукойл»нинг асосий акциядори Вагит Алекперов бўлиб, унинг бойлиги Forbes маълумотларига кўра, 28,7 миллиард долларга тенг. У 2022 йилда Британия санкцияларидан сўнг компания президенти лавозимини тарк этган.
Ўзбекистонда ҳам «Лукойл» йирик инвесторлардан бири саналади. Компаниянинг мамлакатдаги инвестициялари 10 миллиард доллардан ошган. «Ўзбекнефтгаз» раиси Баҳодир Сидиқов жорий санкциялар қўшма лойиҳаларга таъсир кўрсатиши мумкин, аммо Ўзбекистон ҳукумати компания активларини сотиб олиш масаласи ҳозирча кун тартибида йўқлиги ҳақида айтган эди.
Эслатиб ўтамиз, АҚШ ва ЙИ жорий этган чекловлар ортидан «Лукоил» ўзининг хориждаги активларини сотиш ниятида эканини расман эълон қилган эди.
