Молдовалик молиячи «Ўзсаноатқурилишбанк» кузатув кенгашининг раиси бўлди
У йирик банк инқирозидан сўнг тизимни барқарорлаштириш, ислоҳотлар ўтказиш ва банк соҳасига бўлган ишончни қайтаришда муҳим рол ўйнаган.
Молдовалик таниқли иқтисодчи ва молиячи Сержиу Чокля «Ўзсаноатқурилишбанк» кузатув кенгашининг раиси этиб сайланди. Бу ҳақда банкнинг расмий саҳифасида келтирилган.
52 ёшли Чокля банк назорати, молиявий тартибга солиш, корпоратив бошқарув ҳамда инвестиция-банк фаолияти соҳаларида тажрибага эга. У Молдова Иқтисодий билимлар академиясини тамомлагач, Франциянинг нуфузли Пантеон-Ассас университетида халқаро иқтисодиёт ва ривожланиш йўналиши бўйича магистрлик ва аспирантура даражасини олган. У румин, инглиз, француз ва рус тилларини мукаммал билади.
Миллий банк раҳбари бўлишдан олдин у халқаро молия тизимида, хусусан, Франциянинг йирик BNP Paribas банк гуруҳида 17 йилдан ортиқ ишлаган. Лондон, Париж ва Москва идораларида корпоратив молиялаштириш департаменти раҳбари ҳамда бошқарувчи директор лавозимларида фаолият юритган.
2016-йилда Молдова парламенти томонидан мамлакат бош банки раислигига сайланган. У йирик банк инқирозидан сўнг тизимни барқарорлаштириш, ислоҳотлар ўтказиш ва банк соҳасига бўлган ишончни қайтаришда муҳим рол ўйнаган. 2018-йилнинг ноябр ойида ўз хоҳиши билан истеъфога чиққан. У учта давлат — Молдова, Руминия ва Франция фуқаролигига эга.
Маълумот учун, мамлакатдаги давлат банкларидан бири «SQB» ярим йилда фойдасини 36,7 фоизга ошириб, 1,1 трлн сўмга етказган. Ўтган йилнинг мос давридаги соф фойда 808,6 млрд сўмни ташкил қилганди.
Банк фойдаси ўсишига фоизсиз даромадларнинг 202 фоизга кескин ошиши сабаб бўлди. Бу кўрсаткич 3,45 трлн сўмдан 10,41 трлн сўмга кўпайган. «Ипотекабанк»дан фарқли равишда «SQB» кредитлар бўйича захира учун ўтган йилга нисбатан 4,7 трлн сўм кўпроқ ажратди. Акс ҳолда фойда бундан ҳам кўпроқ бўларди. Бу банкнинг IPOга чиқишга тайёргарлик кўраётгани билан боғлиқ бўлиши мумкин.
«SQB» Миллий инвестиция жамғармаси (UzNIF) таркибида Лондон ва Тошкентда IPOга чиқарилганди. Банкнинг 40 фоизи жамғармага тегишли. IPO натижасида UzNIF’нинг 31 фоизи учун қарийб 700 млн долларга яқин маблағ жалб қилинганди.
Эслатиб ўтамиз, аввалроқ «Ўзсаноатқурилишбанк» акциялари рекорд даражада қимматлаганди.
