Олтин, кумуш ва платина рекорд даражадаги ўсишни давом эттирмоқда

Бугун, 23 январ куни олтин яна бир бор рекорд даражага чиқди, кумуш ва платина ҳам ўсишни давом эттириб, тарихий энг юқори кўрсаткичларга етди. Бу АҚШ активларига бўлган ишончнинг геосиёсий кескинликлар ва иқтисодий ноаниқликлар туфайли сусайиши билан изоҳланмоқда. Бу ҳақда «Reuters» хабар берди.

Спот олтин нархи унцияси учун 0,3 фоизга ошиб, 4 951,91 долларга етди. Аввалроқ рекорд даража – 4 966,59 долларгача кўтарилган эди.

Февраль ойи учун етказиб бериладиган АҚШ олтин фьючерслари 0,8 фоизга ошиб, унцияси учун 4 952,80 долларни ташкил этди.

«АҚШга ва унинг активларига бўлган ишонч силкинди, эҳтимол, бутунлай. Айнан шу ҳолат маблағларни қимматбаҳо металларга йўналтирмоқда. Шу боис «узилиш» деган ибора ишлатилмоқда. Менимча, бу бўрттириш эмас», — дейди Capital.com компаниясининг катта бозор таҳлилчиси Кайл Родда.

Доллар индекси (.DXY) 23 январ куни икки ҳафтадан ортиқ вақт ичидаги энг паст даража яқинида сақланиб турди. У ҳафта давомида 1 фоизга пасайди, бу эса долларда баҳоланадиган металларни хорижий харидорлар учун арзонроқ қилди. Шу билан бирга, Уолл-стритнинг асосий индекслари ҳафта бошида Трампнинг Европа Иттифоқига нисбатан янги бож таҳдидлари сабаб инвесторлар қўрқувга тушиб, кескин сотувларга гувоҳ бўлди, кейинчалик эса тикланди.

22 январ куни кечқурун Брюсселда фавқулодда саммитга тўпланган Европа Иттифоқи раҳбарлари АҚШ президенти Дональд Трампнинг Гренландия масаласидаги кескин бурилишидан сўнг енгил нафас олди. Шу билан бирга, улар агар Трамп яна таҳдид қилса, жавоб қайтаришга тайёр эканликлари ҳақида огоҳлантириш берди.

АҚШ президенти эса, ўз навбатида, НАТО билан тузилган келишув орқали АҚШ учун Гренландияга тўлиқ ва доимий кириш имконияти таъминланганини айтди. Бироқ ҳар қандай келишув тафсилотлари ҳануз ноаниқ бўлиб қолмоқда, Дания эса орол устидан суверенитет муҳокама мавзуси эмаслигини қатъий таъкидлади.

Спот кумуш нархи 2,6 фоизга сакраб, унцияси учун 98,71 долларга етди. Илгарироқ у рекорд даража – 99,20 долларни қайд этган эди.

«Кумуш атрофидаги асосий ҳикоя унинг олтинга нисбатан устун натижа кўрсатиши ва саноатда қўлланилишидир», — деб қўшимча қилди Родда.

Бозорлар Федерал захира тизими 2026 йилнинг иккинчи ярмида фоиз ставкаларини икки марта, ҳар сафар чорак фоиз пунктга пасайтиришини кутмоқда. Бу эса даромад келтирмайдиган олтиннинг жозибадорлигини оширади.

Спот платина нархи рекорд 2 684,43 долларга етганидан сўнг, 0,4 фоизга ошиб, унцияси учун 2 639,40 доллар бўлди. Палладий эса 0,9 фоизга пасайиб, 1 903,10 долларга тушди.