Ўпирилиб тушган йўл, аэропорт қурилиши учун тендер ва бекатлардаги дўконлар бузилиши — 12-март дайжести

Ўзбекистонликлар пулларини асосан қаерда сақламоқда?

Марказий банк ўтказган сўров натижаларига кўра, Ўзбекистонда аҳолининг ярмидан кўпи жамғармаларини банкда эмас, уйида ёки ҳамёнида нақд пул кўринишида сақламоқда. Сўровда қатнашганларнинг 50 фоиздан ортиғи пулни нақд ҳолда сақлашини билдирган, атиги 7 фоизи эса маблағларини расмий молиявий воситалар орқали жамғаришини айтган. Шунингдек, 8 фоиз респондент пулни чорва ёки мол-мулк орқали, 7 фоизга яқини норасмий жамғарма гуруҳлари орқали тўплашини маълум қилган.

Сўров натижаларига кўра, аҳолининг 39 фоизи умуман жамғарма қилмаслигини билдирган. Марказий банк маълумотига кўра, пулни уйда сақлаш инфляция туфайли маблағ қийматининг пасайишига олиб келади. Масалан, 2025 йилда инфляция 7,3 фоизни ташкил этган. Шу билан бирга, банк омонатлари бўйича йиллик фоизлар 21–22 фоиз атрофида бўлиб, бу жамғармани инфляциядан ҳимоя қилиш ва даромад олиш имконини беради.

Тошкентдаги янги туннел йўлида тиргак девор ўпирилиб тушди

Тошкент шаҳри Мирзо Улуғбек туманидаги Темур Малик ва Буюк Ипак йўли кўчалари кесишмасида жойлашган янги туннел йўли атрофидаги йўл ўтказгичнинг бир қисми ўпирилиб тушди. Тошкент шаҳар ҳокимлиги маълумотига кўра, ҳодиса натижасида жабрланганлар қайд этилмаган. Ҳудуд ўраб олинган ва авария хизматлари ҳамда техник мутахассислар томонидан текширув ишлари бошланган.

Дастлабки тахминларга кўра, ўпирилишга сўнгги кунлардаги кучли ёғингарчилик ва тупроқнинг ҳаддан ташқари намланиши сабаб бўлган бўлиши мумкин. Шу билан бирга, лойиҳавий ечимлар, қурилиш сифати, дренаж тизими ва объектни қабул қилиш жараёни ҳам текширилмоқда. Мазкур йўл ўтказгич 2024 йил августида 128,6 млрд сўмлик лойиҳа асосида қурилиб, фойдаланишга топширилган ва у 100–120 йил хизмат қилиши айтилган эди.

Тошкентда дўконли бекатлар бузилмоқда

Тошкентда автобус бекатлари ҳудудида жойлашган 110 та савдо объектини олиб ташлаш жараёни бошланди. Шаҳар ҳокимлиги текширувлар натижасида уларнинг 61 таси ҳужжатларсиз фаолият юритаётганини маълум қилди ва бу ишлар Президентнинг жамоат транспортини такомиллаштиришга оид қарори ҳамда «Шаҳар йўловчилар транспорти тўғрисида»ги қонун асосида амалга оширилаётганини билдирди. Янги бекатлар очиқ форматда қурилиб, уларда ўриндиқлар, электрон таблолар, SOS тугмаси ва кузатув камералари ўрнатилади.

Айни пайтда, дўконлари бузилаётган тадбиркорлар қарордан норози эканини билдирмоқда. Улар бузиш ишлари суд қарори ва расмий огоҳлантиришсиз амалга оширилганини айтмоқда, ҳокимлик эса тадбиркорлар камида 10–15 кун олдин расман огоҳлантирилганини таъкидлади. Маъмурият маълумотига кўра, ҳужжатлари мавжуд тадбиркорларга савдо фаолиятини давом эттириш учун бошқа жойдан ер майдони ажратилиши ёки дўконларни кўчириш имконияти таклиф этилади.

Ўзбекистонда 1,5 млн сўм топиш кимлар учун энг қийин?

Марказий банк ўтказган сўров натижаларига кўра, Ўзбекистонда аҳолининг 35 фоизи 1,5 млн сўмни тезда топишни «жуда қийин» деб ҳисоблайди. Респондентларнинг 25 фоизи бу маблағни жамғармалари ҳисобидан қоплашини айтган, 37 фоизи эса оила ёки дўстлардан ёрдам олишини билдирган. Атиги 13 фоиз иштирокчи пулни ўз меҳнати билан топишини айтган, 10 фоиз бирор нарса сотишни, 2 фоиз кредит олишни танлаган. Шу билан бирга, 6 фоиз респондент бундай маблағни умуман топа олмаслигини билдирган.

Сўров натижаларига кўра, 1,5 млн сўмни топиш айниқса аёллар, ёши катта фуқаролар ва айрим ҳудудларда яшовчилар учун қийин. Эркакларнинг 28 фоизи буни жуда қийин деб баҳолаган бўлса, аёлларда бу кўрсаткич 40 фоизга етган. Шунингдек, 60 ёшдан ошганлар орасида 41 фоиз бу маблағни топишда қийналишини айтган. Ҳудудий кесимда эса Тошкент шаҳрида бундай фикр билдирганлар 18 фоизни ташкил этса, Жанубий ва Шимолий/Ғарбий ҳудудларда бу кўрсаткич қарийб 50 фоизга яқинлашган.

Бухорода янги халқаро аэропорт қурилиши учун тендер эълон қилинди

Бухорода янги халқаро аэропортни қуриш ва бошқариш бўйича давлат-хусусий шериклик асосида тендер эълон қилинди. Лойиҳа Ўзбекистон ҳукумати, «Uzbekistan Airports», Транспорт вазирлиги ҳамда Иқтисодиёт ва молия вазирлиги ҳамкорлигида амалга оширилади. Янги аэропорт Бухоро туманидаги «Қумсултон» массивида барпо этилиши режалаштирилган ва у ички ҳамда халқаро рейсларга хизмат кўрсатадиган муҳим транспорт марказига айланиши кутилмоқда.

Лойиҳа доирасида майдони 48,5 минг квадрат метр бўлган замонавий йўловчи терминали қурилади. У соатига халқаро рейслар учун 1200 нафар, ички рейслар учун 400 нафар йўловчини қабул қилиш қувватига эга бўлади. Шунингдек, кейтеринг биноси, автотураргоҳлар, юк хизматлари майдонлари ва 8 минг куб метр сиғимли ёқилғи қуйиш мажмуаси қурилади. Аэродром инфратузилмаси давлат бошқарувида қолади, хусусий шерик эса терминал ва унга тегишли инфратузилмани қуриш ҳамда бошқариш учун масъул бўлади.