Осиёда энг бой одам мақоми ҳиндистонликдан хитойликка ўтди
«TikTok» асосчиси Чжан Иминнинг бойлиги $105 млрддан ошиб, Гаутам Аданини ортда қолдирди. Миллиардернинг капитали сўнгги бир ойнинг ўзида $12 млрддан кўпроқ ўсган.
© Bloomberg«ByteDance» компанияси асосчиси Чжан Имин Осиёнинг энг бой одамига айланди. «Bloomberg» хабар беришича, унинг бойлиги $105 млрддан ошиб, аввалги пешқадам Гаутам Аданини ортда қолдирган.
Чжан Иминнинг бойлиги 2019 йил март ойидан буён кузатиб борилади. Шу даврда унинг капитали $13 млрддан қарийб саккиз баробарга ошган. Сўнгги бир ой ичида тадбиркорнинг бойлиги $12 млрддан кўпроқ кўпайган.
Бу ўсиш «ByteDance»нинг сунъий интеллект билан боғлиқ маҳсулотлари ва технологияларига бўлган қизиқиш ортиши билан бир вақтга тўғри келмоқда. Компания «Doubao» чат-боти ва «Seedance» видео генерация воситасини фаол ривожлантирмоқда.
Миллиардер қандай бойиди?
Чжан Имин 1983 йилда Хитойнинг Фуцзян провинциясида давлат хизматчилари оиласида туғилган. У Нанкай университетида таҳсил олиб, 2005 йилда дастурий муҳандислик бўйича бакалавр даражасини олган.
У меҳнат фаолиятини «Kuxun» сайёҳлик стартапида бошлаган. Кейин «Microsoft»да ишлаган, аммо у ердаги фаолиятини «қизиқ, аммо фойдасиз» деб баҳолаган. 2012 йилда эса Пекинда «ByteDance»га асос солган.
Компаниянинг биринчи йирик маҳсулоти «Toutiao» янгилик агрегатори бўлган. 2016 йилда «ByteDance» «Douyin» иловасини ишга туширди. У халқаро бозорда «TikTok» номи билан танилди. 2021 йилда Чжан Имин компания бош директори ва раиси лавозимларидан кетди.
«Bloomberg» маълумотларига кўра, у ҳозир ҳам «ByteDance»даги овоз бериш ҳуқуқларининг 50 фоиздан ортиғини сақлаб қолган.
Аданининг бойлиги қисқарди
Осиёнинг энг бой инсонлари рейтингидаги ўзгариш Гаутам Аданининг капитали пасайиши фонида юз берди. Унинг бойлиги 2026 йил ёзига қадар $120 млрдга етган эди.
Ҳозир Аданининг бойлиги $104,8 млрдга баҳоланмоқда. Бу Чжан Имин кўрсаткичидан тахминан $200 млн кам.
Рейтингда учинчи ўринни «Reliance Industries» раҳбари Мукеш Амбани эгаллаб турибди. Унинг бойлиги $86,9 млрдга баҳоланган. Шу тариқа, Осиё миллиардерлари рейтингида технологик компания асосчисининг биринчи ўринга чиқиши сунъий интеллект билан боғлиқ активларнинг қиймати қандай тез ўзгараётганини ҳам кўрсатмоқда.
