Pentagon Kubadagi operatsiyaga tayyorgarlik ko‘rilayotganini ma’lum qildi
Qo‘shma Shtatlar Pentagon prezident Donald Trampning tegishli buyruqlarini ijro etishga to‘liq tayyor ekanini ma’lum qildi.
AQSH urush vazirligi ommaviy axborot vositalarining Kubadagi operatsiyaga tayyorgarlik ko‘rilayotgani haqidagi xabarini tasdiqladi. Tafsilotlar oshkor qilinmayapti. Bu haqda «RIA Novosti» xabar berdi.
Avvalroq, ayrim nashrlar AQSH urush vazirligi Kubadagi ehtimoliy operatsiyaga tayyorgarlikni boshlagani haqida yozgandi.
Pentagon «RIA Novosti» nashriga AQSH Kubaga qarshi «bir qator harakatlar»ni rejalashtirayotganini va prezident Donald Trampning tegishli buyruqlarini bajarishga tayyorligini tasdiqladi.
«Biz gipotetik ssenariylar bo‘yicha bashorat qilmaymiz. Vazirlik kutilmagan vaziyatlar uchun bir qator harakatlarni rejalashtirmoqda va prezident buyruqlari kelib tushishi bilan ularni ijro etishga tayyor», — deyiladi idora xabarida.
Eslatib o‘tamiz, shu yilning yanvar oyida Donald Tramp agar Kuba rahbariyati zudlik bilan «kelishuvga erishilmasa», buning oqibatlari yomon bo‘lishidan ogohlantirgan edi. Shuningdek, u Venesuela yetakchisi Nikolas Maduro hokimiyatdan chetlatilganidan so‘ng, Kubaga keladigan Venesuela mablag‘lari va neft ta’minoti to‘xtatilishini ta’kidlagan.
Keyinroq Oq uy rahbari Venesueladan neft yetkazib berish to‘xtatilgandan so‘ng Kuba halokatga juda yaqin ekanini ta’kidladi.
So‘ngra Donald Tramp Kuba tomonidan milliy xavfsizlikka tahdid tufayli AQSHda favqulodda holat rejimini joriy etish to‘g‘risidagi farmonni imzoladi. Bunga javoban Kuba hukumati AQSHni agressiya va shantajda aybladi.
Mart oyida Tramp yana Kubani bosib olish haqida gapirib, matbuot anjumanida bu u uchun sharaf bo‘lishini aytdi.
