Putin «Wildberries» omborlarini tiklashga davlat yordam berishini aytdi

Rossiya Prezidenti Vladimir Putin Ukraina Qurolli kuchlari (UQK) tomonidan hujumga uchragan logistika va ombor quvvatlarini (xususan, «Wildberries» marketpleysi omborlarini) tiklashda davlat ishtirok etishini ma’lum qildi va bu borada hukumatga maxsus dastur ishlab chiqishni topshirdi. Bu haqda TASS nashri xabar bermoqda.

Strategik rivojlanish va milliy loyihalar kengashi yig‘ilishida so‘zga chiqqan davlat rahbari garchi kompaniya nomini to‘g‘ridan-to‘g‘ri tilga olmagan bo‘lsa-da, hukumatga mamlakatdagi logistika quvvatlarini qayta tiklash dasturini qabul qilishni vazifa qilib qo‘ydi.

«Shu bilan birga, shikastlangan obyektlarni tiklash ishlarini sifat jihatidan yangi texnologik darajada olib borish kerakligini hisobga olish zarur», — deya Putinning so‘zlaridan iqtibos keltirdi nashr.

Hujumlarning iqtisodiyotga ta’siri

Prezident Ukrainaning sanoat va infratuzilma obyektlariga qilayotgan hujumlari Rossiya iqtisodiyotiga ma’lum ma’noda zarar yetkazayotganini tan oldi.

Biroq u, «albatta, bunday hujumlarning hech qanday kritik oqibatlari yo‘q, bo‘lmagan va bo‘lishi ham mumkin emas», deya ta’kidladi.

«Ammo ular bizga, albatta, zarar yetkazmoqda, bu ayon. Biz buni tushunamiz, ko‘ryapmiz va bilamiz», — dedi Vladimir Putin yig‘ilishda.

«Wildberries» omborlariga qilingan hujumlar haqida

Ma’lumot o‘rnida, joriy yilning iyul oyidan boshlab Ukraina Qurolli kuchlari Wildberries marketpleysining logistika markazlariga muntazam ravishda zarbalar berib kelmoqda. Xabarlarga ko‘ra, ushbu hujumlar oqibatida yetkazilgan umumiy zarar yuzlab milliard rublga baholanmoqda.

Ta’kidlash joizki, «Wildberries» Rossiyadagi eng yirik elektron tijorat platformalaridan biri hisoblanadi va uning logistika markazlari mamlakat bo‘ylab tovarlar ta’minoti zanjirida o‘ta muhim rol o‘ynaydi. Ombor quvvatlarining ishdan chiqishi nafaqat kompaniyaning moliyaviy ko‘rsatkichlariga, balki umumiy savdo-sotiq logistikasiga ham ta’sir ko‘rsatadi.