Россия армияси билан шартнома тузган ўзбекистонлик эркак қамалди

Ўзбекистон Олий суди Россияда шартнома асосида хизмат қилган 32 ёшли республика фуқаросини беш йилга озодликдан маҳрум қилди. Бу ҳақда ТАСС хабар берди. Иш материалларига кўра, эркак 2018 йилда Россияга ишлаш учун кетган, РФ фуқаролигини олган, шу билан бирга Ўзбекистон фуқаролигини сақлаб қолган. Ўтган йили у 2024 йил июлидан 2025 йил июнигача ҳарбий хизматни ўташ учун шартнома имзолаган. Бироқ эркак 2024 йил 27 июл куни жароҳат олиб, шифохонага ётқизилган ва сентябрь ойида вақтинча яроқсиз деб топилган. Декабрь ойида у Ўзбекистон паспорти билан Самара - Тошкент рейсида ватанига қайтган, шахсий телефонини кўздан кечириш чоғида жанговар ҳаракатларда иштирок этганини кўрсатувчи ҳужжатларнинг фотосуратлари топилган. Олий суд уни Ўзбекистон Жиноят кодексининг 154-моддаси 1-қисми ("Ёлланиш") бўйича айбдор деб топган ва 5 йил муддатга озодликдан маҳрум қилиш жазоси тайинлаган. Uznews нашрига кўра, эркак Украинадаги ҳарбий ҳаракатларда иштирок этган. У 17 июль куни шартнома тузиб, 18 июлда Луганск шаҳрига юборилган. 27 июлдаги ракета зарбаси пайтида яраланиб, ҳарбий госпиталда даволанган. У урушда иштирок этгани учун 3 миллион рубль пул мукофотини олган ва 7 декабрда Ўзбекистонга қайтиб келган. Телефонидан урушда қатнашгани ва пул мукофоти ҳақидаги маълумотлар топилган.