Россияда уйсизлар урушга юборилгани аниқланди

Россия Ички ишлар вазирлиги маълумотига кўра, Челябинск ва Свердловск областларида фаолият юритган этник жиноий гуруҳ фронт учун одам ёллашни фирибгарлик схемасига айлантирган. Тўда ижтимоий ҳаётдан четлашган, турар жойи йўқ шахсларни излаб топиб, уларга вақтинчалик манзил таклиф қилган ва Мудофаа вазирлиги билан шартнома тузишга кўндирган.

Шартнома имзолангандан кейин ёлланганларни ишончнома беришга ёки қўшимча банк карталари очишга мажбурлашган. Бу эса жиноятчиларга ҳисоб рақамларига тўлиқ кириш имконини берган. Гуруҳ таркибида «янги аскарлар» билан сохта никоҳ тузиб, улар яраланган ёки ҳалок бўлган тақдирда тўловларни қўлга киритишни кўзда тутган аёллар ҳам бўлган.

Айбловга кўра, тўда ҳаракатлари Ўта йирик миқдордаги фирибгарлик деб баҳоланган ва 159-модданинг 4-қисми бўйича жиноят иши қўзғатилган. Бу модда учун энг юқори жазо 10 йил озодликдан маҳрум қилишни назарда тутади. Тергов доирасида 25 ёшдан 50 ёшгача бўлган етти киши қамоққа олинди. Уйларида ўтказилган тинтувлар чоғида учта автомобил, 60 га яқин мобил телефон ҳамда банк ва сим-карталар мусодара қилинган. Етказилган зарар ҳажми ҳозирча аниқланмоқда.

Маълумотларга кўра, бу бир ҳафта ичида фош этилган иккинчи шунга ўхшаш ҳолат. 22 ноябр куни Росгвардия Москвада «махсус ҳарбий операция фахрийлари»ни ўғирлаб, улар ва уларнинг яқинларидан пул талаб қилган бошқа уюшган гуруҳни қўлга олганини билдирган. Ушбу таркибда «Батал-Ҳожи» террорчилик ташкилоти аъзоси Руслан Картоев ҳам бўлгани айтилган.

Октябр ойида эса суд Украина уруши иштирокчиларини аэропортларда ва барларда алдаб пулдан ювиб келган 30 га яқин шахсни қамоққа олган. Улар фронтдан қайтаётган ҳарбийларни «фахрий» сифатида аниқлаб, товламачилик ва ўғриликка асосланган тизим орқали пул ундирган. Айрим ҳолларда такси ҳайдовчилари йўл ҳақини бир неча баробар қўшиб кўрсатиб, тўловдан бош тортган аскарларни банк карталарини тортиб олиш орқали қўрқитгани маълум қилинган.