Россияликларнинг 83 фоизи урушдан чарчаганини тан олди — ОАВ
Кремл буюртмасига кўра ўтказилган ёпиқ сўров натижаларига кўра, россияликларнинг кўпчилиги урушдан чарчаган, аҳолида кайфият кескин пасайган.
Россияда ўтказилган ёпиқ социологик сўров натижалари жамоатчилик кайфияти кескин ўзгарганини кўрсатмоқда. Кремл буюртмасига кўра Бутунроссия жамоатчилик фикрини ўрганиш маркази (ВЦИОМ) томонидан амалга оширилган тадқиқотда россияликларнинг 56 фоизи «СВОдан жуда чарчаганини», яна 27 фоизи эса «қисман розилигини» билдирган. Яъни умумий ҳисобда 83 фоиз фуқаро урушдан чарчаганини очиқ айтган.
Сўров натижаларига кўра, урушни давом эттиришни қўллаб-қувватлаётганлар улуши 20 фоиздан камга тушган. Бу эса Россия жамиятида ҳукуматнинг ташқи сиёсатини ёрқин қўллаб-қувватлаш илгари кузатилган даражада эмаслигини кўрсатади. Социологлар фикрича, 2024 йил охиридан бери кайфият кескин ёмонлашган.
Бунга асосий сабаблардан бири — иқтисодий аҳвол. Инфляциянинг ўсиши, даромадлар стагнацияси ва ҳукумат томонидан солиқ юкининг ортиши армияни молиялаштириш мақсадига хизмат қилмоқда. Звоновский ва Ходикин каби тадқиқотчиларнинг таъкидлашича, ҳар бир «яшаш осонлашди» деган шахсга қарши уч киши «яшаш ёмонлашди» деб жавоб бермоқда.
Шу билан бирга, Кремл цензурага муносабатни ҳам ўрганмоқда. Сўров натижаларига кўра, россияликларнинг фақат 24 фоизи ғарб платформаларининг блокланишини қўллаб-қувватлаган, 39 фоизи эса бунга қарши. Қолган 30 фоиз эса аниқ позиция билдирмаган.
Ёшлар буни шахсий ҳаётга аралашиш сифатида баҳоламоқда, катта ёшдагилар эса «давлат ва тартибни ҳимоя қилиш» деб қабул қилмоқда.
