Трамп баёнотидан сўнг нефт нархлари пасайди
Доналд Трамп Венесуэла АҚШга нефт жўнатишини айтганидан кейин нефт нархи тушди. Венесуэла нефти АҚШга йўналтирилиши мумкинлиги бозорда ортиқча таклиф хавотирини кучайтирди.
7 январ куни нефт нархлари пасайди. Бунга АҚШ президенти Доналд Трамп Венесуэла АҚШга 30–50 миллион баррелгача санкцияланган нефт етказиб беришини айтгани сабаб бўлди, дея хабар қилмоқда «Reuters». Инвесторлар таклифнинг ошиши эҳтимолига тезкор реакция қилишди.
Савдоларда АҚШнинг Ғарбий «Texas Intermediate» нефти 78 сентга ёки 1,37 фоизга арзонлаб, баррели 56,35 долларга тушди. «Brent» маркаси фючерслари эса 61 сентга, яъни 1 фоизга пасайиб, баррели 60,09 долларни ташкил этди. Иккала эталон ҳам олдинги сессияда бир доллардан ортиқ йўқотишни қайд этган эди.
Бозор иштирокчилари бу йил глобал таклиф етарли бўлиши мумкинлиги ҳақидаги кутилмаларни, АҚШнинг Венесуэла етакчиси Николас Мадурони қўлга олганидан кейин мамлакатда қазиб олиш билан боғлиқ ноаниқликлар билан солиштирмоқда. Трамп ижтимоий тармоқда нефт бозор нархида сотилиши ва тушумлар АҚШ назоратида бўлишини ёзди.
Таҳлилчиларга кўра, баёнот таклифни чеклашдан кўра оширишга мойилликни англатади. Бу эса глобал ортиқча таклиф хавотирини кучайтиради. «Reuters» манбалари Каракас ва Вашингтон келишуви дастлаб Хитойга йўналтирилган юкларни қайта тақсимлашни талаб қилиши мумкинлигини билдирди. Венесуэла ўзининг асосий «Merey» навини «Brent»га нисбатан тахминан баррелига 22 долларга арзон сотмоқда, келишув қиймати 1,9 млрд долларгача баҳоланмоқда.
Ҳозирда бу оқимни асосан «Chevron» бошқармоқда. Корпорация PDVSA билан қўшма корхона орқали АҚШга кунига 100–150 минг баррел нефт экспорт қилмоқда. «Haitong Futures» таҳлилчилари АҚШга йўналтирилган экспорт глобал ортиқча таклифни чуқурлаштиришини айтди.
«Morgan Stanley» корпорацияси эса 2026 йил биринчи ярмида бозорда кунлик 3 млн баррелгача профицит бўлиши мумкинлигини баҳолади. Шу билан бирга, API маълумотларига кўра, ўтган ҳафта АҚШ хом нефт захиралари 2,77 млн баррелга камайган.
