Tramp eng obro‘siz prezidentga aylandi

AQSH prezidenti Donald Trampning reytingi tarixiy minimum darajaga tushdi.

«The Economist» jurnali va «YouGov» sotsiologik instituti o‘tkazgan tadqiqot natijalariga ko‘ra, Tramp 2009 yildan buyon eng past qo‘llab-quvvatlash ko‘rsatkichiga ega prezident sifatida qayd etildi.

So‘rovnomaga ko‘ra, ayni paytda Trampni qo‘llab-quvvatlashning sof ko‘rsatkichi minus 24 foizni tashkil qilmoqda. Bu raqam so‘nggi bir hafta ichida yana 1,9 punktga yomonlashgan.

Hozirda amerikaliklarning 34 foizi prezident faoliyatini ma’qullayotgan bo‘lsa, 58 foizi uning siyosatiga salbiy baho bergan. Yana 8 foiz respondent aniq fikr bildirmagan.

Obro‘sizlanish sabablari

Tahlilchilarning fikricha, reytingning keskin pasayishiga bir nechta omil ta’sir ko‘rsatgan. Ular orasida tashqi siyosatdagi murakkab vaziyat va iqtisodiy sohadagi muammolar asosiy o‘rinni egallamoqda.

Xususan, Eron bilan bog‘liq harbiy harakatlar atrofidagi bahslar hamda iqtisodiy jarayonlarni boshqarish bo‘yicha qarorlar jamoatchilik noroziligini kuchaytirgan.

Tayanch hududlarda ham pasayish

«YouGov» ma’lumotlariga ko‘ra, Trampga nisbatan salbiy munosabat nafaqat raqiblar orasida, balki uning an’anaviy qo‘llab-quvvatlovchilari yashaydigan hududlarda ham kuchaymoqda.

Tahlilchilarning ta’kidlashicha, 2024 yilgi prezidentlik saylovlarida Tramp g‘alabasini ta’minlagan ayrim shtatlarda ham norozilik kayfiyati kuchaymoqda.