Трамп Нобель тинчлик мукофотини олмагани учун яна норозилик билдирди

Америка Қўшма Штатлари президенти Дональд Трамп халқаро можароларни ҳал қилиш ва гаровга олинганларни озод этишдаги хизматларини яна бир бор эслаб, Нобель тинчлик мукофотини олмаганидан норозилигини билдирди. У бу ҳақда Truth Social ижтимоий тармоғидаги саҳифасида ёзди.

Трамп 2026 йилги мукофот соҳибаси, БМТнинг Инсон ҳуқуқлари бўйича собиқ олий комиссари Нави Пиллейни танқид қилиб, унинг қандай хизматлари учун тақдирланганини тушунмаслигини айтди. АҚШ президенти ўзининг саккизта урушни ҳал қилгани ҳақидаги даъвосини такрорлаб, бу натижалар Нобель мукофотига лойиқ эканини таъкидлади.

Трамп, шунингдек, Эрон ҳамда Россия ва Украина ўртасидаги можароларни ҳам ҳал қилиш ёки уларда ғалаба қозониш арафасида эканини билдирди. Унинг фикрича, аввал ҳал қилинган низоларнинг ўзиёқ мукофот олиш учун етарли бўлган.

«Аслида мен шунчаки битта эмас, тинчлик бўйича саккизта Нобель мукофотини олишим керак эди», — деб ёзди АҚШ президенти.

У Эроннинг ядро қуролига эга бўлишига йўл қўймаганини, Венесуэла етакчиси Николас Мадурони қўлга олишда иштирок этганини ҳамда турли мамлакатларда юзлаб гаровга олинганларни озод этишда муҳим роль ўйнаганини ҳам даъво қилди.

2026 йилги Нобель тинчлик мукофоти Нави Пиллейга инсон ҳуқуқлари ва халқаро ҳуқуқни ҳимоя қилишга қўшган ҳиссаси учун берилган. Трамп эса қўмита қарорини танқид қилиб, уни Норвегия обрўсига тушган «кетмас доғ» деб атади.

АҚШ президенти тинчлик ўрнатишда ўз ҳиссаси борлигини айтган саккизта можаро қаторида Камбоджа ва Таиланд, Сербия ва Косово, Конго Демократик Республикаси ва Руанда, Исроил ва Эрон, Покистон ва Ҳиндистон, Миср ва Эфиопия, Арманистон ва Озарбайжон, шунингдек, Исроил ва ҲАМАС ўртасидаги низоларни санаб ўтди.

Аввалроқ, 2026 йил январь ойида Венесуэла мухолифати етакчиси Мария Корина Мачадо ўзига 2025 йилда берилган Нобель тинчлик мукофотини Трампга топширган эди. Бироқ Нобель қўмитаси мукофотни бошқа шахсга ўтказиш мумкин эмаслигини билдирган.