Трамп суд билан таҳдид қилиб видеомонтаж учун BBCни узр сўрата олди

Буюк Британиянинг BBC телерадиокорпорацияси АҚШ президенти Доналд Трампдан расман узр сўради. Узрнома BBCʼнинг расмий сайтида эълон қилинди.

Узрхоҳликка олиб келган сабаб — 2024 йилда эфирга узатилган «Панорама» дастури эпизоди орқали Трамп Капитолий штурмига даъват қилгандек кўрсатилгани бўлди. Корпорация ушбу таҳрир сўзлар кетма-кетлигини тўғри акс эттирмаганини тан олган, бироқ товон пули тўлашдан бош тортган.

BBCʼнинг расмий баёнотига кўра, 2021 йил 6 январда Трамп томонидан айтилган сўзлар турли вақтларда бўлганига қарамай, эфирда уларни кетма-кет монтаж қилиш орқали нотўғри манзара яратилган. Жумладан, Трампнинг «Биз Капитолийга борамиз ва сенаторларимизни кутиб оламиз» деган сўзи ва 50 дақиқа ўтиб айтган «Биз курашамиз. Жиддий курашамиз» деган гаплари битта ифодага бирлаштирилган.

Дастур АҚШдаги сайловлардан бир ҳафта олдин намойиш этилган ва жиддий танқидларга сабаб бўлган. Трампнинг адвокатлари 1 млрд долларлик даъво билан таҳдид қилган, жавоб тариқасида кечирим ва эфир орқали раддия беришни талаб қилган.

Медиаширкат раҳбари Самир Шоҳ Оқ уйга шахсан мактуб йўллаб, содир бўлган ҳолат учун афсус билдирган. Шу билан бирга, BBC бош директори Тим Дэйви ва ижрочи директор Дебора Тернесс 9 ноябр куни истеъфога чиққанини эълон қилган.

BBC ўз изоҳида монтаж шакли бўйича афсусда экани, лекин бўҳтон тўғрисидаги даъво миқдоридан кескин норози эканлигини билддирган.