Трамп Европа ва АҚШ ўртасида совуқ уруш бошлади — Axios
Янгиланган АҚШ хавфсизлик стратегияси Европага қаратилган танқидлар, миграция сиёсатига эътироз ва идеологик зиддиятлар орқали Вашингтон–Брюссел муносабатларини янада таранглаштирмоқда.
АҚШнинг янгиланган миллий хавфсизлик стратегиясида Европанинг ички ишларига аралашишга ундовчи даъватлар пайдо бўлди. Бу ҳақда Axios нашри хабар бермоқда.
Қайд этилишича, ҳужжатда ЕИнинг миграция сиёсати танқид қилинган ва Европа Иттифоқида демократик тамойиллар заифлашаётгани айтилган.
Таъкидланишича, Европа Иттифоқи ва АҚШ ўртасидаги муносабатларнинг ёмонлашишига яна бир сабаб Европа Иттифоқининг Х платформасига 140 миллион доллар миқдорида жарима солгани бўлган. Европа раҳбарлари платформани «одамларни чалғитиш ва дезинформация тарқатиш»да айблаган. АҚШ эса буни «Американинг технологик компанияларига ва халқига қилинган ҳужум» деб баҳолаган. АҚШ вице-президенти Жей Ди Венс жаримани «ахлат» деб атаб, бу Х платформасининг ЕИ цензурасини рад этгани учун қўлланилганини айтди.
Axios'нинг ёзишича, Вашингтон ва Брюссел ўртасида ғоявий зиддиятлар ҳам кучайиб боряпти. Бу, айниқса, америкалик сиёсатчиларнинг Европа Иттифоқидаги ўнг партияларга, хусусан «Германия учун муқобил» партиясига бўлган хайрихоҳлигида намоён бўлмоқда.
