Трамп Зеленскийнинг тинчлик режаси билан танишмаганидан норози бўлди
Трамп Украина раҳбари АҚШ ишлаб чиққан тинчлик режаси билан танишмаганидан ҳафсаласи пир бўлганини айтди.
АҚШ президенти Доналд Трамп Украина президенти Владимир Зеленскийнинг Вашингтон томонидан ишлаб чиқилган тинчлик таклифи билан ҳали танишиб чиқмагани ҳақидаги хабар унинг ҳафсаласини пир қилганини билдирди. Трамп бу фикрларни Жон Кеннеди номидаги саҳна санъати марказида бўлиб ўтган тадбирда баён қилди.
«Биз президент Путин билан ҳам, Украина раҳбарлари, жумладан, Зеленский билан ҳам суҳбатлашдик. Айтишим керакки, президент Зеленскийнинг ҳали тинчлик таклифини ўқимаганини эшитиб, бироз хафа бўлдим. Буни бир неча соат олдин билдим. Зеленскийнинг атрофидагиларга режамиз ёққан, аммо унга ёқмагандек. Россияга имкон бўлса, бутун Украинани эгаллаган бўларди. Аммо, менимча, Россия тинчлик режасидан қониқади. Лекин Зеленский бунга рози бўладими-йўқми — бунга унчалик ишонмайман», деган Трамп.
2 декабр куни АҚШ президентнинг махсус элчиси Стив Уиткофф ва Трампнинг куёви Жаред Кушнер Москвада Россия президенти Владимир Путин билан тахминан беш соат давом этган музокара ўтказгани маълум қилинган эди.
Россия президенти ёрдамчиси Юрий Ушаковнинг айтишича, мулоқот чоғида Америка томони таклиф қилган тинчлик режаси ва унга боғлиқ яна тўртта қўшимча ҳужжат муҳокама қилинган. Ғарб ОАВ маълумотларига кўра, музокаралардаги энг қийин масала Украинанинг Донбассдаги ўз назоратида бўлган ҳудудни Россия тасарруфига ўтказишдан бош тортиши бўлган.
