Трампга ниҳоят Нобел медали топширилди

Венесуэла мухолифати етакчиси Мария Корина Мачадо Вашингтондаги ёпиқ учрашувда АҚШ президенти Доналд Трампга Нобел Тинчлик мукофоти медалини тақдим этганини маълум қилди. Бу икки раҳбарнинг биринчи бевосита учрашуви бўлиб, у Венесуэладаги сўнгги кескин сиёсий воқеалардан сўнг бўлиб ўтди.

Мачадонинг айтишича, медал рамзий маънога эга бўлиб, у АҚШ раҳбарининг Венесуэла халқининг эркинлиги йўлидаги саъй-ҳаракатларига миннатдорлик ифодаси сифатида берилган. Трамп эса ижтимоий тармоқда буни ўзаро ҳурмат белгиси деб атади ва учрашувни катта шараф сифатида баҳолади.

Шу билан бирга, Оқ уй Мачадони Венесуэланинг янги раҳбари сифатида қўллаб-қувватлашдан тийилди. АҚШ маъмурияти ҳозирча мамлакатдаги вақтинчалик ҳокимият бошлиғи Делси Родригес билан иш олиб бормоқда. Трамп уни ҳам ижобий таърифлаб, сўнгги мулоқотларни самарали деб атади.

Оқ уйдан чиққанидан сўнг, Мачадо дарвоза олдида тўпланган тарафдорларига мурожаат қилди. Associated Press агентлигига кўра, у испан тилида «Биз президент Трампга ишонамиз» деган.

Эслатиб ўтамиз, Норвегия Нобел қўмитаси тинчлик бўйича Нобел мукофотини бошқа шахсга, жумладан АҚШ президенти Доналд Трампга ўтказиш имкониятини қатъий рад этди. Қўмита бу қарорни Нобел жамғармаси Низомининг 10-бандига таяниб изоҳлаб, мукофот бир марта берилгач, у абадий кучда қолишини таъкидлади.

Қўмита баёнотида қайд этилишича, мукофот берувчи ташкилот қарори устидан шикоят қилиш мумкин эмас. Шунингдек, Нобел мукофоти на қайтариб олинади, на тақсимланади ва на бошқа шахсларга топширилади. Қарор эълон қилинганидан кейин у ўзгармас ҳисобланади.

Аниқлик киритилар экан, қўмита Стокголм ва Ослода фаолият юритувчи мукофот берувчи идоралар ҳозиргача бирор лауреатдан мукофотни қайтариб олиш масаласини кўриб чиқмаганини билдирди. Бироқ бу ҳолат қўмита лауреатларнинг кейинги фаолиятини кузатмаслигини англатмайди, дейилади баёнотда.

2025 йил октябр ойида тинчлик бўйича Нобел мукофоти Венесуэла мухолифати етакчиси Мария Корина Мачадога «Венесуэлада демократияни тарғиб қилиш йўлидаги саъй-ҳаракатлари учун» топширилган эди. Доналд Трамп ҳам ушбу мукофотга номзод сифатида кўрсатилган, аммо ғолиб бўлмаган.