Уруш тақдирини халқ ҳал қилади: Зеленский ҳудудий ён беришларни референдумга қўймоқчи

Украина президенти Володимир Зеленский Россия томонидан камида 60 кунлик ўт очишни тўхтатиш эълон қилинса, урушни якунлашга қаратилган тинчлик режасини умумхалқ референдумига қўйишга тайёр эканини маълум қилди. Бу ҳақда Axios нашри хабар берди.

Зеленскийнинг сўзларига кўра, якшанба куни бўлиб ўтадиган учрашувда у АҚШ президенти Доналд Трамп билан урушни тўхтатиш бўйича асосий келишув параметрларини мувофиқлаштиришга умид қилмоқда. Бу музокаралар Вашингтоннинг можарони тезроқ дипломатик йўл билан ҳал қилишга интилиши фонида кечмоқда.

Нашр маълум қилишича, Трамп томонидан таклиф этилаётган режада ҳануз Украина учун оғриқли ҳисобланган ҳудудий ён беришлар масаласи сақланиб қолмоқда. Зеленский эса бу шартларни юмшатиш ёки Украина учун мақбулроқ шаклга келтиришга ҳаракат қилаётганини яширмаган.

Президент таъкидлашича, агар у ҳудудий масалалар бўйича «кучли» позицияни ҳимоя қила олмаса, у ҳолда бундай қарорни якка ўзи қабул қила олмайди. Шу сабабли, у Украина халқининг тўғридан-тўғри розилигини олишни муҳим деб ҳисоблайди.

Axios ёзишича, АҚШ томони Зеленскийнинг референдум ўтказишга тайёрлиги ва ҳудудий ён беришларни мутлақ инкор этмаслик позициясини жиддий сиёсий сигнал сифатида баҳоламоқда. Бу қадам музокаралар учун янги имконият очиши мумкин.

Шу билан бирга, Зеленский референдум ўтказиш жиддий сиёсий, логистик ва хавфсизлик муаммолари билан боғлиқ эканини қайд этди. Унинг фикрича, бундай овоз беришни тайёрлаш ва ўтказиш учун 60 кунлик сулҳ энг камида зарур бўлган муддат ҳисобланади.