Xitoy, AQSH va Hindiston 2030-yilgacha jahon iqtisodiy o‘sishining qariyb yarmini ta’minlashi mumkin

Kelgusi besh yil davomida jahon yalpi ichki mahsuloti o‘sishining qariyb yarmi Xitoy, AQSH va Hindiston hissasiga to‘g‘ri kelishi kutilmoqda. Bu haqda «Visual capitalist» reytingida so‘z boradi.

Qanday prognozlar berilmoqda?

Tahlillarga ko‘ra, 2030-yilgacha deyarli barcha iqtisodiyotlar o‘sishi kutilmoqda. Biroq yangi ishlab chiqarish hajmining asosiy qismi cheklangan sondagi mamlakatlar hissasiga to‘g‘ri keladi.

Reyting 2026-2030-yillar oralig‘ida qaysi mamlakatlar jahon yalpi ichki mahsulotiga eng katta hissa qo‘shishi kutilayotganini ko‘rib chiqadi. U Xalqaro valuta jamg‘armasi (IMF)ning Jahon iqtisodiy ko‘rinishi (World Economic Outlook, WEO) hisoboti prognozlariga asoslangan.

Muhimi, bu raqamlar inflatsiyani hisobga olgan real o‘sishni emas, balki AQSH dollaridagi nominal YAIM o‘sishini aks ettiradi.

Iqtisodiyotlar o‘sishi

Xitoy (+5,7 trln AQSH dollari), AQSH (+5,0 trln AQSH dollari) va Hindiston (+2,1 trln AQSH dollari) 2030-yilgacha jahon yalpi ichki mahsulotiga qo‘shiladigan umumiy qo‘shimcha hajmning qariyb yarmini – 49,7 foizini ta’minlashi kutilmoqda.

Xalqaro valuta jamg‘armasi prognozlariga ko‘ra, kelgusi besh yil ichida Surinam dunyodagi eng tez o‘sadigan iqtisodiyotga aylanadi, mamlakat YAIMi 137 foizga o‘sishi mumkin.

Xitoy va AQSH absolut o‘sish bo‘yicha yetakchi

Umumiy qo‘shimcha YAIM hajmi bo‘yicha Xitoy birinchi o‘rinni egallaydi. Prognozlarga ko‘ra, 2026-2030-yillar oralig‘ida mamlakat iqtisodiyoti 5,7 trillion dollarga oshadi.