YOII davlatlari Armanistonni referendum o‘tkazishga chaqirdi

Belarus, Qozog‘iston, Qirg‘iziston va Rossiya rahbarlari Armanistonni Yevropa Ittifoqi (YI) va Yevrosiyo iqtisodiy ittifoqi (YOII) o‘rtasidagi tanlovni aniqlash uchun imkon qadar tezroq umumxalq referendumini o‘tkazishga chaqirdi.

Aleksandr Lukashenko, Qosim-Jo‘mart To‘qayev, Sadir Japarov va Vladimir Putin imzolagan qo‘shma bayonotda Armaniston fuqarolari mamlakatning kelgusi integratsiya yo‘nalishi bo‘yicha qaror qabul qilishi kerakligi ta’kidlangan.

YOII ogohlantirmoqda

Bayonotga ko‘ra, 2026 yil dekabr oyida bo‘lib o‘tadigan Oliy Yevrosiyo iqtisodiy kengashi yig‘ilishida Armanistonning YOII bilan munosabatlarini cheklash ehtimolining iqtisodiy oqibatlari yuzasidan maxsus hisobot taqdim etiladi.

Hujjatda Armanistonning Yevropa Ittifoqiga a’zo bo‘lishga intilishi YOII mamlakatlarining iqtisodiy xavfsizligi uchun muayyan xatarlarni keltirib chiqarishi mumkinligi qayd etilgan.

Rossiya prezidenti Vladimir Putin Yerevanni YOIIdan chiqish mamlakat iqtisodiyoti uchun og‘ir oqibatlarga sabab bo‘lishi mumkinligidan ogohlantirdi. Uning aytishicha, bu holat erkin savdo imtiyozlarining bekor qilinishi, bojxona nazoratining tiklanishi hamda texnik va fitosanitar standartlarning o‘zaro tan olinishi to‘xtatilishiga olib keladi.

Yerevan shoshilmayapti

Putin, shuningdek, Rossiyada mehnat qilayotgan Armaniston fuqarolari uchun ham yangi cheklovlar paydo bo‘lishi mumkinligini aytdi. Uning baholashicha, YOIIdan chiqish Armaniston yalpi ichki mahsulotining kamida 14 foizga qisqarishiga sabab bo‘lishi ehtimoldan xoli emas.

Avvalroq Moskva Yerevan Yevropa Ittifoqiga integratsiya jarayonini davom ettirsa, energetika sohasidagi ayrim kelishuvlar qayta ko‘rib chiqilishi mumkinligini bildirgan.

Shuningdek, Rossiya may oyi oxirida Armanistondan ayrim qishloq xo‘jaligi va oziq-ovqat mahsulotlari importini chekladi.

Armaniston bosh vaziri Nikol Pashinyan esa hozircha YOIIdan chiqish masalasi kun tartibida emasligini bildirdi. Uning ta’kidlashicha, mamlakat ittifoqning to‘laqonli a’zosi bo‘lib qolmoqda va bunday masala faqat obyektiv zarurat tug‘ilgandagina ko‘rib chiqiladi.

Shu bilan birga, 2025 yilda Armaniston parlamenti mamlakatning Yevropa Ittifoqiga qo‘shilish jarayonini boshlash haqidagi qonunni qabul qilgan. May oyida o‘tgan Armaniston — YI sammitida Pashinyan mamlakatning Yevropa bilan yaqinlashuvi davom etishini ta’kidladi.