АҚШ Россия нефтига қарши санкцияларни вақтинча юмшатди

АҚШ 11-апрелгача Россия нефти ва нефт маҳсулотларини сотишга қўйилган санкцияларни вақтинча юмшатди. 12-мартга қадар танкерларга юкланган нефт ва нефт маҳсулотларини сотишга рухсат берувчи лицензия кеча, 12-март куни АҚШ Молия вазирлиги сайтида эълон қилинди.

Молия вазири Скотт Бессентнинг айтишича, бундай қарорни АҚШ президенти Доналд Трамп жаҳон энергетика бозорларида барқарорликни таъминлаш ва нефт нархларини паст даражада сақлаб қолиш мақсадида қабул қилган. Бу қарор АҚШ ва Исроилнинг Эронга қарши уруш ҳаракатлари фонида қабул қилинган.

Бессент X ижтимоий тармоғида ёзган постида бу «тор доирага мўлжалланган, қисқа муддатли чора» эканини таъкидлади. Унинг фикрича, бу қарор Россия ҳукуматига катта молиявий фойда келтирмайди, чунки Россия бюджетига тушадиган асосий даромадлар нефт ва газдан олинадиган солиқлар орқали шаклланади. Бессент нефт нархининг ўсишини «қисқа муддатли ва вақтинчалик узилиш» деб атаб, узоқ муддатда бу ҳолат АҚШ учун «катта фойда» келтиришини айтди.

«Fox News» маълумотига кўра, 12-март ҳолатига дунё бўйлаб 30 та турли нуқтада турган танкерларда тахминан 124 миллион баррел Россия нефти мавжуд. Телерадиоканал ҳисоб-китобларига кўра, Ҳўрмуз бўғозидаги блокада сабаб юзага келаётган кунлик нефт йўқотишларини ҳисобга олганда, бу ҳажм 5–6 кунлик таъминот учун етарли.

Илгари АҚШ Ҳиндистонга ҳам рухсат берган

Бундан олдин, 6-март куни Бессент Вашингтон Ҳиндистонга денгиздаги танкерларда турган Россия нефтини 30 кун давомида сотиб олишга рухсат берганини маълум қилган.

10-март куни матбуот анжуманида Трамп Россияга қарши нефт санкцияларини вақтинча юмшатиш эҳтимолига ишора қилди:

«Биз нархларни тушириш учун нефт билан боғлиқ санкцияларни вақтинча бекор қиламиз. Айрим мамлакатларга нисбатан санкцияларни тўхтатамиз. Агар тинчлик бўлса, эҳтимол кейин уларни қайта тиклашга ҳам ҳожат қолмас».

G7 позицияси

Бироқ 11-март куни G7 давлатлари Эрон билан боғлиқ уруш фонида Россия нефтига қўйилган санкцияларни бекор қилмасликка келишиб олганини маълум қилди. Эртаси куни АҚШ энергетика вазири Крис Врайт Россияга нисбатан санкцияларни юмшатиш режалаштирилмаганини билдирди.

АҚШ стратегик захираларидан нефт чиқармоқда

Шу билан бирга, уруш фонида нефт нархларининг ўсиши АҚШни ҳам стратегик захиралардан нефт чиқаришга мажбур қилди. 12-март куни АҚШ Энергетика вазирлиги мамлакат 172 миллион баррел нефт тақдим этишини маълум қилди.

Бу қадам Халқаро энергетика агентлиги олдидаги мажбуриятни бажариш ҳисобланади. Ушбу ташкилотга жами 32 та давлат аъзо бўлиб, режага кўра улар биргаликда 400 миллион баррель нефт стратегик захиралардан бозорга чиқариши керак.