Аргентина 500 минг доллар эвазига фуқаролик беришни режалаштирмоқда

Аргентина ҳукумати инвестиция эвазига фуқаролик бериш тизимини жорий этишни режалаштирмоқда. Бу ҳақда Financial Times нашри хабар берди.

Нашр маълумотига кўра, янги механизм жорий йил давомида ишга туширилиши мумкин. Дастурда иштирок этмоқчи бўлганларга икки хил вариант таклиф этилади: давлатга қайтарилмайдиган тарзда 500 минг доллар хайрия қилиш ёки 1 миллион долларлик нол купонли давлат облигацияларини сотиб олиш.

Лойиҳанинг асосий мақсади мамлакатнинг ташқи қарз мажбуриятларини молиялаштириш учун қўшимча валюта маблағларини жалб қилишдан иборат. Қайд этилишича, Аргентина 2020 йилда қарзларини реструктуризация қилганидан сўнг халқаро капитал бозорларига қайта олмаган ва ҳозирда молиялаштиришнинг муқобил манбаларини изламоқда. Мамлакат Иқтисодиёт вазирлиги ушбу маълумотларга изоҳ беришдан бош тортган.

Ташаббус қабул қилинса, фуқаролик олган шахслар дунёнинг қарийб 170 давлатига визасиз сафар қилиш имкониятига эга бўлади. Шунингдек, дастурда иштирок этиш учун мамлакатда доимий яшаш талаби жорий этилмаслиги мумкин. Бу эса инвесторларга қўшимча солиқ мажбуриятларидан қочиш имконини бериши айтилмоқда.

Лойиҳа ишлаб чиқилишида иштирок этаётган маслаҳатчиларнинг таъкидлашича, дастур, асосан, сиёсий беқарорлик ва геосиёсий хавфлар фонида муқобил фуқаролик излаётган АҚШ ва Европа давлатларининг бадавлат фуқароларига мўлжалланган.

Шу билан бирга, фуқароликни инвестиция эвазига бериш дастурлари коррупция хавфи ва миллий хавфсизликка таҳдидлар сабаб бир неча йилдан буён танқид қилиб келинмоқда. Европа Иттифоқи ва Буюк Британияда бундай дастурлар тўлиқ бекор қилинган ёки кескин чекланган.

Аргентинанинг ўзида ҳам ташаббус ҳуқуқий тўсиқларга дуч келиши ммкин. Ўтган йили миграция қоидаларига киритилган ўзгартишлар судда баҳсларга сабаб бўлган эди. Юристлар мамлакат конституциясига кўра миграция сиёсатига оид ваколатлар парламентга тегишли эканини таъкидлаб, бундай ташаббуснинг репутацион хавфлари иқтисодий фойдадан юқори бўлиши мумкинлигини қайд этмоқда.