Будапештдаги саммит нега бекор қилингани маълум бўлди
Россия АҚШга Украина бўйича норасмий коммюнике юбориб, Донбасснинг тўлиқ назоратини талаб қилган. Бу талаб Трампнинг «фронт чизиғини музлатиш» позициясига зид.
Будапештда ўтказилиши кутилган Трамп ва Путин саммити бекор қилинишига Россиянинг янги талаблари сабаб бўлгани маълум бўлди.
Reuters агентлигининг икки нафар манбасига таяниб хабар беришича, Москва ўтган дам олиш кунларида Вашингтонга норасмий, хос коммюнике юборган. Ҳужжатда Россия Украинa билан тинчлик келишувига эришиш учун Донбасснинг барча ҳудудлари устидан назоратни талаб қилган.
Манбалардан бирининг таъкидлашича, бу талаб АҚШ президенти Доналд Трампнинг мавжуд позициясига зид. Трамп урушни тўхтатиш учун фронт чизиғини музлатиш етарли, деб ҳисоблайди. Шунинг учун ҳам Вашингтон Москва билан бу шартларда келишувга боришни маъқул кўрмаган.
Reuters’нинг маълумотича, Путин Будапештдаги бўлғуси учрашувда ҳам аввалги кескин позициясидан чекинмаслигини маълум қилган. Россия ҳозирги фронт чизиғида ҳарбий ҳаракатларни тўхтатишни рад этган.
Европалик дипломатлардан бирининг агентликка берган изоҳига кўра: «Руслар ҳаддан зиёд талаб қилдилар, Америка делегацияси эса Будапештда Трамп учун ҳеч қандай келишув бўлмаслигини англаб етди», — деган.
Шу билан Путин ва Трампнинг икки ой ичидаги иккинчи учрашув жойи бўлиши мумкин бўлган Будапешт саммити амалга ошмади. Москва ҳозирча бу маълумотга расмий муносабат билдирмади.
