Чехия президенти: Трамп бир неча ҳафтада НАТОга Путиндан кўпроқ зарар келтирди
Чехия президенти Петр Павел АҚШ раҳбари Доналд Трампни НАТО ишончини йўқ қилишда айблаб, унинг ҳаракатлари алянс учун РФ президенти Владимир Путиндан хавфлироқ эканини айтди.
Чехия президенти ва НАТОнинг собиқ генерали Петр Павел АҚШ раҳбари Доналд Трампнинг Эронга қарши уруш борасидаги танқидларини алянс учун ҳалокатли деб баҳолади.
Прагадаги Карлов университетида сўзга чиққан Павелнинг таъкидлашича, Трамп сўнгги ҳафталарда НАТОга бўлган ишончни пучга чиқаришда Владимир Путиннинг узоқ йиллик ҳаракатларидан ҳам ўтиб тушди. У АҚШ президентининг иттифоқчилар манзилига қарата айтган гапларини мутлақо адолатсизлик деб атади.
Павелнинг тушунтиришича, НАТО мудофаа алянси бўлиб, ўз ҳудудидан ташқаридаги урушларда автоматик равишда ёрдам беришга мажбур эмас. Европа давлатларига уруш мақсадлари ҳақида олдиндан маълумот берилмаган ва ҳеч ким улардан ҳамкорликни сўрамаган.
Вазият кутилмаган тус олгачгина Трамп иттифоқчилардан Ҳўрмуз бўғозидаги хавфсизликни таъминлашни талаб қилган. Рад жавобини олгач эса, у НАТОдан ҳафсаласи пир бўлганини очиқчасига эълон қила бошлади.
Иттифоқчиларни жазолаш режаси
«The Wall Street Journal» нашрининг ёзишича, Трамп маъмурияти Эрон билан урушда АҚШни қўллаб-қувватламаган НАТО аъзоларини жазолаш режасини қизғин кўриб чиқмоқда. Бу эса алянс ичидаги бўлинишни янада кучайтириши мумкин.
Вашингтон ўз қўшинларини Германия ва Испания каби давлатлардан олиб чиқиб, уларни Полша, Литва ва Руминия каби «содиқроқ» мамлакатларга жойлаштиришни режалаштирмоқда. Ҳозирда Европада 84 мингга яқин Америка ҳарбий хизматчилари жойлашган бўлиб, уларнинг кўчирилиши минтақа хавфсизлик тизимини бутунлай ўзгартиради.
Трампнинг кескин баёноти
8 апрел куни НАТО бош котиби Марк Рютте билан учрашувдан сўнг Доналд Трамп ижтимоий тармоқларда кескин баёнот қолдирди: «НАТО бизга керак бўлганда ёнимизда турмади ва яна керак бўлса, ёрдамга келмайди».
Бош котиб Рютте ҳам Европа давлатлари Трампнинг синовидан ўта олмаганини тан олиб, АҚШ президентининг ҳафсаласи пир бўлганини яхши тушунишини айтди.
АҚШ Давлат котиби Марко Рубио иттифоқчиларни қўллаб-қувватламаганликда айблаб, Эрон билан уруш тугагач, Вашингтоннинг НАТОдаги иштирокини қайта кўриб чиқиш зарурлигини таъкидлади. Алянснинг келажаги борасидаги якуний қарорни Трампнинг ўзи қабул қилади.
