«Энергия тарифлари ошиши инфляция прогнозларида инобатга олинган» — Марказий банк

VAQT.UZ мухбирининг маълум қилишича, давлат томонидан тартибга солинадиган нархлар Марказий банк прогнозларида аллақачон ҳисобга олинган.

Раиснинг таъкидлашича, инфляция ҳисоб-китобларида энергия тарифлари ва коммунал тўловлар ўсиши асосий омиллардан бири сифатида инобатга олинади.

«Инфляция прогнозларида давлат томонидан тартибга солинадиган тарифлар ҳаммаси инобатга олинади. Албатта, биз ҳукумат билан доимий мулоқотдамиз ва шу прогноз шакллантирилганда, шу энергия тарифлари, коммунал тўловларнинг режалаштирилаётган ўсиши албатта инобатга олинади».

Унинг айтишича, йил бошида эълон қилинган тариф индексацияси ҳам прогнозларга киритилган, бироқ якуний кўрсаткичлар ҳали тасдиқланмаган.

«Йилнинг бошида ўша эълон қилинган 10 фоизгача индексацияни инобатга олганмиз, лекин ҳали аниқ рақамлар эълон қилинмади».

Шу билан бирга, энергия тарифларини ошириш муддати ва якуний қарорлар бошқа масъул идоралар ваколатига киради.

Ишмeтов, шунингдек, ташқи омиллар босими ортиб бораётганини қайд этди. Хусусан, Халқаро валюта жамғармаси глобал иқтисодий ўсиш прогнозини пасайтириб, инфляция ўсиши эҳтимолини билдирган. Унинг сўзларига кўра, юқори ва ўта юқори хатарли сценарийлар ҳам мавжуд бўлиб, улар асосан нефть нархлари динамикасига боғлиқ.

«Хатарли, ўта юқори хатарли ҳам сценарийлар бор. Бу асосан нефть нархига боғлиқ бўлади… агар хатарлар яна кўпайса ва бу глобал инфляциянинг ўсиши бизга ҳам таъсири ўтса, кутилмаларнинг ошиши бошланса, биз пул-кредит сиёсатимизнинг қатъийлигини сақлаб қолиш бўйича аниқ чора кўришимизга тўғри келади».

Марказий банк раисига кўра, мавжуд ноаниқликлар сабаб барча омиллар доимий мониторинг қилиб борилмоқда ва зарурат туғилганда пул-кредит сиёсати мос равишда қатъийлаштирилади.

Эслатиб ўтамиз, аввалроқ VAQT.UZ энергия тарифлари ошиши ҳақида ваъдалар, вариантлар ва таклифларни таҳлил қилган эди.