Эрон уруш бошланганидан бери илк бор БААда йирик газ конини ёқиб юборди
Бирлашган Араб Амирликларининг асосий порти Фужейра нефт юклашни тўхтатди.
Бирлашган Араб Амирликлари ҳукумати Саудия Арабистони билан чегара яқинида жойлашган Шах газ конида операцияларни тўхтатганини маълум қилди. Бу қарор Эрон дронлари ҳужумидан кейин қабул қилинган, деб хабар берди «Bloomberg»
Ҳужум натижасида объектда кучли ёнғин юзага келган. Ушбу конни «ADNOC» ва «Occidental Petroleum» биргаликда бошқаради. Расмий маълумотларга кўра, жабрланганлар йўқ. Бу уруш бошланганидан бери Эрон БАА ҳудудидаги нефт-газ объектига зарар етказган биринчи ҳолат бўлди.
Фужейра порти нефт юклашни тўлиқ тўхтатди
Можаро кучайган бир пайтда, стратегик аҳамиятга эга Фужейра порти нефт юклашни тўлиқ тўхтатди. Бу порт БАА нефтини Ҳўрмуз бўғозини четлаб ўтиб экспорт қилиш имконини берувчи ягона йўл ҳисобланади. 17-март куни нефт терминаллари ва денгиздаги швартовка нуқталари ишдан тўхтатилди.
Минтақадаги беқарорлик янада кучайди: БАА ҳаво ҳудуди дрон ва ракеталар ҳужуми туфайли вақтинча ёпилди, кейин эса рейслар тикланди. Бир кун олдин Эрон Дубай халқаро аэропортида ёқилғи резервуарига зарба берган, бу эса шаҳар устида қуюқ тутун пайдо бўлиши ва рейсларнинг қисқа муддатга тўхтатилишига олиб келган.
Нефт нархи тахминан 40 фоизга ошди
Ҳўрмуз бўғози амалда ёпилиши БАА, Саудия Арабистони, Ироқ ва Кувайтни нефт ишлаб чиқаришни қисқартиришга мажбур қилди. Қатар эса суюлтирилган газ ишлаб чиқаришни тўлиқ тўхтатди. Сўнгги икки ҳафтада нефт нархи тахминан 40 фоизга ошди, бу эса АҚШда бензин нархининг кўтарилишига олиб келди. Дизел нархи 5 доллар/галлондан ошиб, 2022-йил декабридан бери илк бор бундай даражага чиқди.
Бу вазият Доналд Трамп учун Конгрессга оралиқ сайловлар арафасида муаммо бўлиши мумкин. У Эрон билан урушни шу ҳафта якунлаш мумкинми, деган саволга: «Мен бундай деб ўйламайман, аммо бу тез орада содир бўлади – кутишга кўп қолмади», деб жавоб берган.
