«Ferrari»нинг илк электромобили кимошди савдосида тарихий рекорд ўрнатди

«Ferrari» брендининг биринчи тўлиқ электрлаштирилган автомобилининг ягона нусхаси хайрия аукционида 40 миллион долларга сотилиб, кимошди савдолари тарихида янги автомобиллар бўйича мутлақ рекорд ўрнатди. Бу ҳақда «BIZTECH» нашри хабар бермоқда.

Махсус буюртма асосида яратилган 2026 йилги «Ferrari Luce» «Tailor Made» русумли автомобил Калифорниядаги «Monterey Car Week» тадбири доирасида «RM Sotheby’s» кимошди савдосида сотилган. Хабарларга кўра, «Chassis 0» (Нолинчи шасси) номи билан танилган ушбу транспорт воситаси «Ferrari Luce» дастурининг биринчи ишлаб чиқарилган шассиси бўлиб, Италия ишлаб чиқарувчисининг «Tailor Made» бўлими томонидан махсус конфигурация қилинган.

«RM Sotheby’s» вакилларининг маълум қилишича, 40 миллион долларлик савдо «Luce» моделини аукционда сотилган энг қиммат янги автомобилга айлантирди. Бундан олдинги рекорд 2025 йилда айнан шу аукционда 26 миллион долларга сотилган ягона нусхадаги «Ferrari Daytona SP3 Tailor Made» автомобилига тегишли эди.

Кимошди савдосидан тушган барча маблағлар «Ferrari Foundation» орқали таълим лойиҳаларига йўналтирилиши маълум қилинди. Шунингдек, аукцион уйи ушбу савдо учун ўзининг харидорлик устамасидан воз кечган. Ҳозирча рекорд нархдаги автомобилни сотиб олган харидорнинг шахси сир тутилмоқда.

Махсус дизайн ва техник хусусиятлар
Автомобил ёруғлик тушишига қараб яшилдан бинафшаранггача товланувчи махсус ишлаб чиқилган ярим хира марварид рангли ташқи қопламага эга. Шунингдек, унинг салони металл эффектли чарм билан қопланган бўлиб, махсус ғилдирак дисклари ва ўзига хос дизайндаги тормоз калиперлари билан жиҳозланган.

Нашрнинг ёзишича, кимошди савдосидан сўнг автомобил Италиянинг Маранелло шаҳридаги «Ferrari» бош қароргоҳига қайтарилади ва 2027 йилнинг биринчи чорагида янги эгасига топширилади.

Жорий йилнинг май ойида тақдим этилган «Luce» модели «Ferrari» компаниясининг биринчи тўлиқ электрлаштирилган автомобили ҳисобланади ва компаниянинг анъанавий ички ёнув двигателли спорт автомобилларидан тубдан фарқ қилади. Тўрт эшикли ва беш ўриндиқли ушбу автомобил жами 1050 от кучига эга тўртта электр мотори билан ҳаракатга келтирилади ҳамда бир марталик қувват билан 530 километрдан ортиқ масофани босиб ўта олади.

«Ferrari» маълумотларига кўра, автомобил 100 км/соат тезликка 2,5 сонияда эришади ва унинг максимал тезлиги 310 км/соатдан ошади. Автомобил дизайни «Apple» компаниясининг собиқ бош дизайнери Жони Айв ва дизайнер Марк Ньюсон томонидан асос солинган «LoveFrom» креатив студияси билан ҳамкорликда яратилган.