«Hana Bank» Ўзбекистон бозорига кирмоқчи

Жанубий Кореянинг «Hana Bank» компанияси Ўзбекистон Республикаси Инвестициялар, саноат ва савдо вазирлиги билан инвестициялар ва молия соҳасида ўзаро ҳамкорлик қилиш бўйича англашув меморандумини имзолади. Ушбу ҳужжат 11-сентябр куни имзоланган. Бу ҳақда «Yonhap News» агентлиги хабар берди.

Мазкур келишув доирасида икки ташкилот Ўзбекистондаги потенциал молиявий ҳамкорлик имкониятларини ўрганишга келишиб олган.

Шунингдек, вазирлик «Hana Bank» муассасасининг Ўзбекистон бозорига кириб келишини бевосита қўллаб-қувватлаган. Бундан ташқари, Ўзбекистон молия соҳасини ривожлантириш мақсадида кенг қамровли ҳамкорликни амалга ошириш режалаштирилган.

Марказий Осиё бозорига кириш ва жорий йилги режалар

Маълум қилинишича, «Hana Bank» Ўзбекистонни Марказий Осиё минтақасига кириш учун ўзининг асосий маркази сифатида танлаган ва айни пайтда мамлакат ҳудудида ўз ваколатхонасини очиш устида иш олиб бормоқда.

Банк режасига кўра, йил охирига қадар маҳаллий ваколатхонани ташкил этиш ишлари тўлиқ якунланади. Шундан сўнг, банк Марказий Осиё молия бозори ва ундаги бизнес имкониятларини кўриб чиқиб, маҳаллий бозорга тўлақонли кириб келишни бошлайди.

«Ушбу келишувнинг имзоланиши орқали биз Ўзбекистон ҳукумати билан ҳамкорлик алоқаларини янада мустаҳкамлаймиз ҳамда икки мамлакатнинг молиявий ва иқтисодий ривожланишига ҳисса қўшадиган турли ҳамкорлик лойиҳаларини ишлаб чиқамиз», — деди банк вакили.

Эслатиб ўтамиз,1997 йилдан буён Ўзбекистонда Жанубий Корея капитали иштирокидаги «KDB Bank Uzbekistan» фаолият юритиб келмоқда