«Ишланглар, биродарлар»: Путин Зеленскийнинг урушни тугатиш ҳақидаги мактубига жавоб берди

Россия президенти Владимир Путин Украина президенти Воладимир Зеленскийнинг урушни тўхтатиш бўйича ўтказилиши таклиф этилган шахсий учрашувидан бош тортди. Бу ҳақда 5 июн куни Петербург халқаро иқтисодий форумида сўз очди.

Путиннинг учрашувдан бош тортиш сабаблари

Владимир Путин ўз нутқида Украина президентининг оммавий хатини «элементларида такаббурлик бор» деб атади ва унинг мазмунидан қониқмаслигини билдирди.

Путиннинг таъкидлашича, Зеленский аввалроқ россиялик бизнесменлардан бири орқали учрашув сўраган, бироқ кейинроқ ҳужумлар содир этилган.

«Мен эрталаб Песков менга узатган бу қоғозни юзаки кўриб чиқдим. Муаллиф менинг ёшим ҳақида сўз очибди. Албатта, ёш ҳақида ҳамма ўйлаши керак, лекин энг муҳими — бу ишга лаёқатлилик. У шунингдек, ҳокимиятда бўлиш вақтига ҳам эътибор қаратибди. Бу муҳим масала. Агар ҳокимиятни Конституция доирасидан ташқарида ушлаб турилса, бу узурпация деб аталади, бу жиноий жавобгарликка тортиладиган жиноятдир. Сайловларга боришдан қўрқмаслик керак, барчага шуни маслаҳат берган бўлардим. Муаллиф Анкориж келишувларига амал қилмаслик кераклигини, Европада ҳақиқий хавфсизлик кафолатларини излаш кераклигини кўрсатибди. Нега у Трампни бунга рад этяпти? Қурол олмоқчи, лекин Трампни кафолатчи сифатида кўришни истамаяпти. Биз Дональд дунё кўз ўнгида муаллифни қандай тарбиялаганини кўрдик. Унинг одоб-ахлоқига келсак, у ерда ҳали ишлаш керак бўлган жиҳатлар бор. Мен ҳеч қачон учрашишдан бош тортмаганман, лекин қуруқ гаплар билан вақт ўтказишдан маъно кўрмаяпман. Бизга келишувлар керак. ҚК (Украина Қуролли Кучлари) Старобелскдаги коллеж ётоқхонасига зарба берди. Мен Киевга борган бизнесмендан сўрадим: бу нимани англатади? Улар учрашув сўрашяпти ва шундай жиноятларни содир этишяпти? Бу хатда ўзига хос такаббурлик элементлари бор. Ҳозирча учрашишдан маъно кўрмаяпман. Мурожаатни бу хат муаллифларига эмас, бизнинг жангчиларимизга йўллаш керак. Бутун мамлакат сизга қараб турибди. Ишланглар, биродарлар», - деди Путин.

Зеленскийнинг рекцияси

Воладимир Зеленский эса ушбу рад жавобини Telegram-канали орқали шарҳлади. Президентнинг қайд этишича, Россия томони яна урушни танлаган ва бу жавоб дунёда кўпчиликнинг ҳафсаласини пир қилган.

«Афсуски, Россия томони яна урушни танламоқда — ҳамма бугунги жавобни эшитди. Кучсиз жавоб. У шунчаки урушни тугатишни истамаяпти. Ўйлайманки, дунёдаги кўпчилик бу жавобдан ҳафсаласи пир бўлди. У ҳеч нарсани ўзгартиришни ва унинг уруши фақат ўзига ва ундан пул ундираётганларга ёқишини тан олишни истамайди — улар бугун жуда тиржайиб туришганди. Демак, Россияда пуллар камайиши, Россияга босим эса кучайиши керак. Бизга ёрдам бераётган барчага миннатдорчилик билдираман! Украина билан бирга бўлган, ҳақиқий тинчликни истаган барчага раҳмат», — дейилади Зеленский баёнотида.