Макрон тўхтаган меҳмонхона яқинида иккита портлаш содир бўлди

Сурия пойтахти Дамашқда 7 июл эрталаб иккита портлаш содир бўлди, деб хабар берди «Reuters».

Портлашлар Франция президенти Эммануэл Макрон тўхтаган «Four Seasons» меҳмонхонаси яқинида юз берди.

Воқеа тафсилотлари ва расмий изоҳлар

AFP хавфсизлик хизматларидаги манбага таяниб хабар беришича, портловчи қурилмалардан бири чиқинди қутисига, иккинчиси эса меҳмонхона яқинидаги автомобилга жойлаштирилган бўлган. «Ал-Арабия» мухбирининг маълумотига кўра, Макрон карвони портлашлардан бир неча дақиқа олдин меҳмонхонани тарк этган.

Елисей саройи вакиллари портлашлар президент карвонидан эшитилмаганини маълум қилди. Ҳозирда Макрон Сурия президент саройида бўлиб, у ерда Франция ва Сурия раҳбарлари учрашуви давом этмоқда.

Сурия давлат агентлиги SANA Ички ишлар вазирлигига таяниб, портлашлар оқибатида камида 18 киши, шу жумладан тўрт полиция ходими жароҳат олганини хабар қилди. Хавфсизлик хизматлари ходимлари портловчи қурилмаларни аниқлашга улгурган, бироқ уларни зарарсизлантира олмаган.

«Reuters» ёзишича, Макрон Башар Асад ҳокимиятдан ағдарилганидан кейин, 2024 йил декабридан бери Сурияга ташриф буюрган Европа Иттифоқининг биринчи давлат раҳбари ҳисобланади. У Дамашққа 6 июл куни кечқурун расмий ташриф билан келган эди.