«Майда-чуйда нарсадек ейди». Путин уруш заруратини ўрмон қонунлари орқали тушунтирди

Россия президенти Владимир Путин болаларга «улар қайси дунёда яшаётгани» ва нега «махсус ҳарбий операция ўтказаётгани»ни тушунтириш учун ёввойи ҳайвонлар ҳаётидан мисолларни муҳокама қилишни таклиф қилди. Бу ҳақда у Белгород вилоятидан бўлган хитой тили ўқитувчиси Дмитрий Баланчук билан суҳбатда айтди.

Ўқитувчи президентга Шимолий қутбга қилган сафари ва у ерда икки оқ айиқни учратгани ҳақида сўзлаб берди. Путин эса бунга жавобан ўша ҳудудларда яшайдиган касаткаларни эслади ва «касатка — оқ айиқ» озиқ-овқат занжирини мисол қилиб келтирди.

«Тасаввур қилинг, у ерларда касаткалар ҳам яшайди. Улар бу айиқларни майда-чуйда нарсадек ейди. Улар шунчаки тўда бўлиб ташланиб, уларни тилка-пора қилиб ташлайди. Бунинг ўзи жуда қизиқ. Шундай озиқ-овқат занжири», — деди президент.

У болаларга бу ҳақда айтиб бериш кераклиги, шунда «улар қайси дунёда яшаётгани ва нега махсус ҳарбий операция ўтказилаётганини тушунишлари»ни қўшимча қилди.

20-август куни Кремл воизи Дмитрий Песков можарони тинч йўл билан ҳал қилиш бўйича ҳозирча оптимизм учун асослар кўринмаётганини айтганди. У вазият Киевнинг позицияси билан боғлиқлигини таъкидлади.

Украина президенти офиси раҳбарининг биринчи ўринбосари Сергей Кислиса эса украин томони «музокаралар столига ўтиришга, Америка томонини тинглашга, россияликлар билан суҳбатлашишга ва ўз далилларини асослаб беришга тайёр» эканини маълум қилди.

Россия президенти Украина инқирозини ҳал қилиш можаронинг келиб чиқишига сабаб бўлган омилларни бартараф этишни ҳисобга олиши кераклигини бир неча бор таъкидлаган. Хусусан, Путин Украинада НАТОга аъзо бўлишга интилишни ана шундай омиллардан бири сифатида тилга олган ва Россия ўз олдига қўйган мақсадларга дипломатик ёки бошқа воситалар орқали эришиш ниятида эканини урғулаган.

Москва томонининг Киевга қўяётган талаблари қаторига, шунингдек, Украина Қуролли кучларини Донецк, Луганск, Херсон ва Запороже вилоятларидан олиб чиқиш ҳам киради. Кремл Россия Украинадаги можарони имкон қадар тезроқ якунлашдан манфаатдор эканини таъкидлаган. Бироқ можаро Россия дастлаб ўз олдига қўйган вазифаларга эришилганидан кейингина якунланиши айтилган.

Эслатиб ўтамиз, аввалроқ Путин Украинадаги урушни янада кескинлаштиришга тайёрланаётгани ҳақида ёзган эдик. Москва Украинадаги тинчлик шартлари бўйича музокаралар боши берк кўчага кириб қолган, деган хулосага келган ва ўз мақсадларига эришиш учун вазиятни янада кескинлаштирмоқчи.