«Mercedes-Benz» фойдаси 17 фоизга камайди
Немис автомобил ишлаб чиқарувчиси йилнинг иккинчи ярмида тикланишга умид қилмоқда.
© Foto: dishcuss.com«Mercedes-Benz Group» 2026-йилнинг биринчи чораги якунлари бўйича соф фойда ва тушум камайганини маълум қилди. Компания натижаларига, аввало, Хитойдаги сотувлар кескин пасайиши таъсир кўрсатган – бу АҚШ бозори ва электромобиллар сегментидаги ўсишни қоплай олмади. Шу билан бирга, компания йилнинг иккинчи ярми кучлироқ бўлишига умид қилмоқда, аммо Яқин Шарқдаги можаро истеъмолчилар ишончини сусайтириши мумкинлигидан огоҳлантирди.
Биринчи чоракда компаниянинг соф фойдаси йиллик ҳисобда 17,2 фоизга камайиб, 1,43 миллиард еврога тушди. Тушум эса 5 фоизга қисқариб, 31,6 миллиард еврони ташкил этди. Енгил автомобиллар сотуви 6 фоизга пасайди, автомобил бўлими маржаси эса 7,3 фоиздан 4,1 фоизга тушиб кетди.
Энг катта салбий таъсир Осиё бозори ҳиссасига тўғри келди: бу ҳудудда сотувлар 24 фоизга камайган. Жумладан, Хитофда, компаниянинг энг йирик бозорида, пасайиш 27 фоизни ташкил этган. Компания буни моделлар алмашуви, макроиқтисодий ноаниқлик ва кучли рақобат билан изоҳлади.
Шу билан бирга, электромобиллар сегменти ижобий натижа кўрсатди: тўлиқ электр автомобиллар сотуви 9 фоизга ошган. Аммо гибрид автомобиллар савдоси 20 фоизга камайган.
АҚШдаги ўсиш эса маълум даражада вазиятни мувозанатлади – бу ерда сотувлар 20,3 фоизга ошган. Бироқ, АҚШдаги импорт автомобилларига қўйилган божлар компания фойдасига қўшимча босим ўтказмоқда. Компания маълум қилишича, ўтган йилда бу каби савдо чекловлари туфайли йўқотишлар 1 миллиард еврони ташкил этган.
Нима кутиляпти?
«Mercedes-Benz Group» йилнинг иккинчи ярми кучлироқ бўлишига умид қилмоқда. Компания молия директори Харалд Вилгелмнинг таъкидлашича, биринчи чорак натижалари йиллик прогнозни сақлаб қолиш имконини бермоқда. Янги моделларга юқори талаб ва буюртмалар портфелининг катталиги иккинчи ярим йилликда ўсишни жадаллаштириши кутилмоқда.
Компания ўсишни тиклаш учун янги моделлар сериясига таянади. Бу қаторга ички ёниш двигателига эга янгиланган моделлар ва янги авлод электромобиллар киради. Асосий янгиликлар орасида GLC моделининг электр версияси ҳамда кузда тақдим этилиши режалаштирилган янгиланган флагман – «S-Class» бор.
Шу билан бирга, Яқин Шарқдаги узоққа чўзилиши мумкин бўлган можаро истеъмолчилар ишончини пасайтириши мумкинлиги қайд этилди. Автомобилларга бўлган талаб ёқилғи нархининг ошиши, фоиз ставкаларининг кўтарилиши ва активлар қийматининг тушишига жуда сезгир ҳисобланади. Компания эса нефт нархларининг эҳтимолий ўсишини ўз прогнозларида аллақачон инобатга олганини билдирди.
Айниқса, инвесторлар Хитой бозорига эътибор қаратишмоқда. У ердаги сотувлар пасайиши компанияни маҳаллий ишланмалар ва ҳамкорликларни кучайтиришга мажбур қилмоқда. Бироқ сўнгги автошоуларда компания раҳбарияти минтақада иқтисодий сустлик сабаб узоққа чўзилиши мумкин бўлган пасайишга тайёрланаётганини ҳам тан олди.
Акциялар нима бўляпти?
«Mercedes-Benz Group» акциялари 29-апрел кунги савдоларда аввал 2,5 фоизга ошди, кейин эса ўсиш суръати пасайиб, тахминан 1,2 фоиз атрофида қолди.
Аналитиклар фикри бир хил эмас: компанияни кузатаётган 24 нафар таҳлилчидан 12 нафари нейтрал позицияда, 9 нафари «ўсиш» (bullish) сценарийни қўллаб-қувватлайди, 3 нафари эса акцияларни сотиш ёки қисқартиришни тавсия қилмоқда. Шунга қарамай, умумий консенсус «бозордан юқори» (Outperform) даражасида қолмоқда. Ўртача мақсадли нарх 61,57 еврони ташкил этади, бу эса охирги ёпилиш нархига нисбатан 25 фоиздан ортиқ ўсиш потенциалини англатади.
Компаниядаги вазият
«Mercedes-Benz Group» сўнгги йилларда сотувлар пасайиши билан курашмоқда. 2025-йил якунларига кўра, компаниянинг соф фойдаси деярли икки бараварга қисқарган – бу ҳолатга савдо божлари, ноқулай валюта курслари ва Хитойдаги кучли рақобат таъсир қилган.
2024-йилдан бери натижалар заиф бўлиб келаётгани сабабли компания харажатларни қисқартириш дастурини ишга туширди. Бироқ бу жараён Германияда қийин кечмоқда, чунки ишлаб чиқариш қувватларининг қарийб ярми шу ерда жойлашган ва меҳнат шартномалари 2035-йилгача иш ўринларини сақлашни кафолатлайди. Шу сабаб компания ходимлар сонини табиий равишда қисқартиришга ва ишлаб чиқаришни оптималлаштириш чораларини кўпроқ хорижий майдонларга кўчиришга мажбур бўлмоқда.
