Метро бекатининг шифти қулади, мудҳиш авария содир бўлди, Беларусдаги андижонликлар норози, «парковка» учун жарима — ҳафта дайжести

[youtue-https://youtu.be/3rfJyW3GieE]

+48 даража: Ёз ёндиряпти

Фарзандингиз боғчаси ёпилмадими? Бу саволни бекорга бермадим.

Ўтаётган ҳафтада Ўзбекистонда кузатилаётган кучли жазирама ҳатто боғчаларнинг ёпилишига сабаб бўлди.

Гидрометеорология хизмати маълумотларига кўра, бу ҳафта мамлакат ҳудудларида ҳаво ҳарорати кескин кўтарилиб, айрим чўл ҳудудларида +48 даражагача етиши кутилмоқда.

Айнан шу прогноз ортидан ижтимоий тармоқларда ҳаво ҳарорати +50, ҳатто +58 даражагача кўтарилгани ҳақидаги видеолар тарқалди. Иқлимшунос Эркин Абдулаҳатов эса бу ҳолатга қуйидагича изоҳ берди.

Мутахассислар бундай кескин иссиқлик ҳолатлари иқлим ўзгаришлари билан боғлиқ жараёнларнинг бир кўриниши эканини таъкидламоқда. Ҳароратнинг йилдан-йилга ошиб бориши эса нафақат инсон саломатлиги, балки қишлоқ хўжалиги, энергетика ва иқтисодиёт учун ҳам янги чақириқларни юзага келтирмоқда.

«Турон» метро бекати томи қулади

Агар сиз метрода ишга ёки ўқишга борадиган бўлсангиз, эҳтиёт бўлинг! Чунки метро томи бошингизга қулаши ҳам мумкин. Якунланаётган ҳафтада пойтахт жамоат транспорти тизимида хавфсизлик масаласи катта муҳокамаларга сабаб бўлди. Ҳар куни миллионлаб йўловчилар фойдаланадиган метрода юз берган ҳодиса инфратузилманинг техник ҳолатини яна бир бор жиддий кўздан кечириш зарурлигини кўрсатди.

16 июль куни Тошкент метросининг Ер усти ҳалқа йўналишидаги, фойдаланишга топширилганига ҳали уч йил ҳам бўлмаган «Турон» бекатида шифтнинг бир қисми силжиб, бекат майдонига қулаб тушди. Ҳодиса оқибатида икки нафар йўловчи енгил тан жароҳати олди ва уларга воқеа жойининг ўзида биринчи тиббий ёрдам кўрсатилди.

Шундан сўнг бекатда поездлар ҳаракати вақтинча тўхтатилди. Ҳозирда мутахассислар ҳодиса сабабларини техник жиҳатдан ўрганмоқда, аниқланган камчиликларни бартараф этиш ишлари олиб борилаётгани маълум қилинди.

Йўловчилар учун эса «Қипчоқ» ва «Қурувчилар» бекатлари ўртасида бепул метробуслар қатнови йўлга қўйилди. «Тошкент метрополитени» юзага келган ноқулайликлар учун узр сўраб, йўловчилар хавфсизлиги тизимнинг энг устувор вазифаси бўлиб қолишини таъкидлади.

Тошкентда мудҳиш авария

Бу ҳафтада пойтахтда содир бўлган мудҳиш йўл-транспорт ҳодисаларидан бири жамоатчилик эътиборини тортди. Хизмат вазифасини бажараётган ЙПХ ходимлари иштирокида фожиали авария содир бўлди.

Воқеа 16 июль куни соат 18:30 атрофида Тошкент шаҳридаги Дўрмон йўли ва Ғазалкент кўчалари кесишмасида учта патруллик мотоцикли ҳамда бир нечта енгил автомобиль иштирокида юз берди.

Тарқалган видеоларга кўра, ҳодисадан аввал чорраҳада ҳаракат ҳуқуқ-тартибот идоралари ходимлари томонидан вақтинча чекланган. Ҳаракат қайта тиклангач, «Onix» русумли автомобиль чорраҳага кирган ва шу пайт катта тезликда ҳаракатланаётган патруллик мотоцикллари билан тўқнашган. Кучли зарба оқибатида автомобильда ёнғин келиб чиқиб, у қарама-қарши йўналишдаги бошқа машиналарга ҳам урилган.

Йўл ҳаракати хавфсизлиги хизмати маълумотига кўра, ҳодиса оқибатида патруллик мотоциклини бошқараётган ЙПХ ходимларидан бири воқеа жойида ҳалок бўлган. Яна бир неча кишига тан жароҳатлари сабаб тиббий ёрдам кўрсатилаётгани билдирилди, бироқ жабрланганларнинг аниқ сони ҳозирча очиқланмади.

Шунингдек, ЙҲХХ ижтимоий тармоқларда ҳодиса кортеж кузатуви вақтида содир бўлгани ҳақидаги хабарларни рад этиб, фуқароларни тасдиқланмаган маълумотларни тарқатмасликка чақирди.

Беларусдаги андижонлик ишчилар норози

Андижонча ваъдалар, бир хил кийим, тантанали кузатув ва норозилик. Бу ҳафта Андижон ва унинг ҳокимлиги яна трендда бўлди.

Андижондан Беларусга тантана билан юборилган ўзбекистонликларни кўрган бўлсангиз керак. Якунланаётган ҳафтада меҳнат миграцияси мавзуси яна кенг муҳокамаларга сабаб бўлди. Бу сафар Беларусга ишлаш учун юборилган бир гуруҳ ўзбекистонликларнинг мурожаати ижтимоий тармоқларда катта резонанс уйғотиб, хориждаги меҳнат шароитлари ва ваъда қилинган имкониятлар юзасидан саволларни кун тартибига олиб чиқди.

Тармоқларда тарқалган видеода Андижон вилоятидан Беларусга ишлаш учун юборилган 10 нафардан ортиқ ишчи уларга ойига 500 доллар маош таклиф қилингани, бироқ ётоқхона ва кундалик яшаш харажатларини ўзлари қоплаши кераклигини айтган.

Ишчиларнинг таъкидлашича, озиқ-овқат, турар жой ва бошқа зарур харажатлардан сўнг қоладиган маблағ уларнинг кутган даромадига мос келмайди. Ҳатто айримлари бундай шароитда ишлагандан кўра, Ўзбекистонда кўпроқ даромад топиш мумкинлигини билдириб, ватанга қайтаришни сўраган.

Мазкур ҳолат Беларус президенти Александр Лукашенко ўзбекистонликларни оилалари билан бирга Беларусга кўчиб бориб ишлашга чорлаган баёнотлари ортидан юз берди. Орадан кўп ўтмай, Андижон вилояти делегацияси Беларусга ташриф буюриб, ишчиларга яратилган шароитлар билан танишган ва икки ҳудуд ўртасидаги ҳамкорлик масалалари муҳокама қилинган эди.

Шундан сўнг Миграция агентлиги ҳолат юзасидан изоҳ бериб, ишчиларни Беларусга юбориш Андижон вилояти ҳокимлигининг пилот лойиҳаси эканини маълум қилди. Агентлик, агар меҳнат шартномаси шартлари бажарилмаса, фуқаролар бошқа ишга ўтказилиши ёки Ўзбекистонга қайтарилишига кўмаклашилишини билдирди.

«Парковка» учун ҳақ тўламаганлар жаримага тортилиши мумкин

Тошкентда парковка учун пул тўлаяпсизми? Аксинча бўлса, бу ҳақда албатта билишингиз керак. Бу ҳафта пойтахт ҳокимлиги пуллик «парковка»лардан фойдаланганлик учун ҳақ тўламаган ҳайдовчиларни жаримага тортишни назарда тутувчи қонун лойиҳасини жамоатчилик муҳокамасига қўйди.

Таклиф этилаётган тартибга кўра, белгиланган муддатда тўлов қилмаган ёки ундан бўйин товлаган фуқароларга БҲМнинг икки баравари миқдорида жарима қўлланилиши мумкин. Бунда бепул ёки имтиёзли фойдаланиш ҳуқуқига эга бўлган фуқаролар ушбу талабдан мустасно этилади.

Лойиҳада қоидабузарликларни аниқлаш учун фото ва видеофиксация воситалари ҳамда ахборот тизимларидан фойдаланиш кўзда тутилган. Янги тартиб фақат давлат тасарруфидаги кўчалардаги йўл бўйидаги пуллик парковкаларга тегишли бўлиб, хусусий шлагбаумли автотураргоҳларга татбиқ этилмайди. Қонун лойиҳаси 28 июлгача жамоатчилик муҳокамасида бўлади.

«Равшан Золотой» Интерпол қидирувидан чиқарилганига изоҳ берди

Якунланаётган ҳафтада Ички ишлар вазирлиги мутасаддилари иштирокида матбуот анжумани ўтказилди. Унда Равшан Муҳитдиновга нисбатан халқаро қидирув масаласи яна муҳокама марказига чиқди.

Ички ишлар вазирлиги вакиллари бу ҳолатга изоҳ бериб, унга нисбатан қидирув 2021 йилда эълон қилинганини, кейинчалик тергов жараёнида айбловлар ўз тасдиғини топмагани сабаб қидирув ва тергов ҳаракатлари тўхтатилганини билдирди.

«Равшан Золотой» номи билан танилган Муҳитдинов Интерполнинг халқаро қидирув рўйхатидан чиқарилгани ҳақидаги хабарлардан сўнг ўз муносабатини билдирди. У 19 йиллик даврдан кейин унга нисбатан айбловлар бекор қилингани ва «тарихий ватанига йўл очилгани»ни маълум қилди.

Маълумотларга кўра, бу Муҳитдинов билан боғлиқ қидирув жараёнлари тўхтатилиши билан боғлиқ биринчи ҳолат эмас. У аввал ҳам узоқ вақт хорижда яшаб, кейинчалик Ўзбекистонга қайтган. Ҳозирда эса унинг Интерпол рўйхатидан чиқарилгани ва келгусидаги режалари жамоатчилик эътиборида қолмоқда.

Жарима баллари бўйича янги «рекордчилар»

Сўнгги вақтларда деярли ҳар ҳафтамиз мудҳиш ЙТҲларсиз ўтмай қолди. Сабаби, «ўпкасини боса олмайдиган», йўлда фақат «Ўзим бор», деб ҳисоблайдиган ҳайдовчилар кўпайгандай. Ўтаётган ҳафтада йўл ҳаракати хавфсизлиги бўйича янги кўрсаткичлар эълон қилинди.

Йўл ҳаракати хавфсизлиги хизмати маълумотига кўра, Ўзбекистонда жарима баллари 12 баллдан ошган ҳайдовчилар сони 671 нафарга етган. Амалдаги тартиб бўйича, бундай ҳайдовчилар суд қарори асосида камида олти ой муддатга транспорт воситасини бошқариш ҳуқуқидан маҳрум қилиниши мумкин.

Янги тизимда айрим қоидабузарликлар учун аввал огоҳлантириш берилади. Жумладан, телефондан фойдаланиш, видео томоша қилиш, нотўғри тўхташ ёки суғуртасиз ҳаракатланиш каби ҳолатларда ҳайдовчи йилига бир марта маъмурий огоҳлантириш олиши мумкин. Такрорий ҳолатларда эса жарима баллари қўлланади.

Қайд этилишича, май ойида 12 баллик чегарага етган ҳайдовчилар сони атиги 49 нафар бўлган бўлса, ҳозир бу кўрсаткич бир неча баравар ошган. Светофорга бўйсунмаслик, қарама-қарши йўналишга чиқиш, тезликни ошириш каби жиддий қоидабузарликлар эса тизим орқали назорат қилинмоқда.