Ўзбекистон «Yangi taraqqiyot banki» акциядорлари қаторига қўшилиши мумкин

Россия молия вазири Антон Силуанов Ўзбекистон «Yangi taraqqiyot banki» акциядорлари сафига қўшилиши мумкин бўлган давлатлардан бири сифатида кўриб чиқилаётганини маълум қилди. Унинг айтишича, банк капитал базасини мустаҳкамлаш ва инвестиция имкониятларини кенгайтириш мақсадида янги иштирокчиларни жалб этиш масаласи муҳокама қилинмоқда. Бу ҳақда ТАCC агентлиги хабар берди.

Маълумотларга кўра, Силуанов Колумбия ва Эфиопия билан бир қаторда Ўзбекистоннинг ҳам банкка қўшилиши молиявий институт фаолиятига сифат жиҳатидан муҳим ҳисса қўшишини таъкидлаган. Унинг фикрича, янги аъзоларнинг жалб этилиши «Yangi taraqqiyot banki»нинг инвестиция лойиҳаларини молиялаштириш салоҳиятини оширади.

Эслатиб ўтамиз, 2026 йил апрел ойида Ўзбекистоннинг мазкур банкда иштирок этиши масаласи Олий Мажлис Қонунчилик палатаси йиғилишида ҳам муҳокама қилинган эди. Ўшанда депутатлар мамлакатнинг банкни ташкил этиш тўғрисидаги битимга қўшилишига оид қонун лойиҳасини кўриб чиққан.

Ҳужжат Ўзбекистон иқтисодиётини янада ривожлантириш, очиқлик сиёсати ва инвестицияларни жалб қилиш йўлидаги муҳим қадам сифатида баҳоланмоқда. Мамлакат банкка аъзо бўлган тақдирда, халқаро инвестиция ресурсларидан кенгроқ фойдаланиш ҳамда инфратузилма ва иқтисодиётнинг стратегик тармоқларини модернизация қилиш учун қўшимча молиялаштириш имкониятларига эга бўлиши мумкин.

Мутахассислар фикрича, «Yangi taraqqiyot banki»га қўшилиш Ўзбекистоннинг халқаро молия институтлари билан ҳамкорлигини кучайтириши ва йирик инвестиция лойиҳаларини амалга ошириш учун янги манбалар очиши мумкин.

Шу билан бирга, бу қадам мамлакатнинг халқаро иқтисодий интеграция жараёнларидаги иштирокини ҳам кенгайтиришга хизмат қилади.