Озодликдан маҳрум қилинган Ташиев футбол ўйинида кўриниш берди
Қирғизистон Миллий хавфсизлик давлат қўмитасининг собиқ раиси Камчибек Ташиев ҳокимиятни зўрлик билан эгаллаб олишни режалаштиришда айбдор деб топилди ва мол-мулки мусодара қилинган ҳолда тўрт йилга озодликдан маҳрум қилинган эди. Суд қароридан бир кун ўтиб Ташиев футбол учрашувига борди.
© kloop.kgҚирғизистон Миллий хавфсизлик давлат қўмитасининг собиқ раиси Камчибек Ташиев 3 июл куни кечқурун Қирғизистон Премьер-лигаси доирасидаги «Muras United» ва «Asiagol» ўртасидаги ўйинга ташриф буюрди.
Ўйин Манасдаги «Қурманбек» стадионида бўлиб ўтди. Ижтимоий тармоқларда жойлаштирилган кадрларда Камчибек Ташиевнинг VIP трибунага кириб келаётгани кўрсатилган.
Суд уни уч йилга шартли назоратга олди. Шу сабабли у қамоқ жазосини ўтамайди. Қамчибек Ташиев мансабни суиистеъмол қилишда ҳам айбланган эди, бироқ суд бу айбловни бекор қилди.
Аввалроқ суд Қамчибек Ташиев ва яна 2 нафар амалдор ҳамда ишнинг бошқа беш нафар фигурантини уч йиллик пробация (синов муддати) қўлланилган ҳолда тўрт йилга озодликдан маҳрум қилиш ҳақида ҳукм чиқарган эди. Агар судланувчилар шу уч йил ичида шартларни бузишса, уларнинг қамоқ жазосига маҳкум қилиниши қўшимча қилинган.
57 ёшли Қамчибек Ташиев 15 йилдан ортиқ вақт давомида Қирғизистон президенти Садир Жапаровнинг энг яқин сафдоши бўлиб келган. 2020 йил октябр ойида у МХДҚга раҳбарлик қилди, кейинроқ эса мамлакат бош вазири ўринбосари этиб ҳам тайинланган эди.
Жорий йилнинг февраль ойида, мамлакат парламентига 75 кишининг навбатдан ташқари президентлик сайловларини ўтказиш тўғрисидаги мурожаати келиб тушганидан сўнг, президентнинг дўсти барча давлат лавозимларидан маҳрум бўлди. Унга нисбатан «Ҳокимиятни зўрлик билан эгаллаш ёки ушлаб туриш, шунингдек, конституциявий тузумни зўрлик билан ўзгартиришга қаратилган ҳаракатлар» ҳамда «Мансаб ваколатини суиистеъмол қилиш» моддалари билан жиноий иш қўзғатилди.
