Пекиннинг икки юзи: Киевга ёрдам, Москвага ресурслар бермоқда
Хитой Украинани зулматдан қутқармоқчи, лекин Россиянинг ҳарбий буджетини тўлдиришда давом этмоқда.
АҚШнинг НАТОдаги элчиси Мэтю Уитакер Хитойни Россия босқинини тўхтатиш имконига эга бўла туриб, бундан фойдаланмаётганликда айблади. Унинг баёнотига кўра, Пекин Украинага инсонпарварлик ёрдамини таклиф этаётган бир пайтда Москвадан нефт ва газ харид қилиш орқали урушни билвосита қўллаб-қувватламоқда. Бу ҳақда «Fox News» хабар берди.
Уитакернинг таъкидлашича, Хитой Россия президенти Владимир Путин билан мулоқот қилиб, икки мақсадда қўлланиладиган технологиялар савдосини ҳамда энергия ресурслари импортини тўхтатса, урушга қисқа муддатда чек қўйиш мумкин.
«Биласизми, бу уруш тўлиқ Хитой томонидан қўллаб-қувватланмоқда», — деди у.
Мюнхен учрашуви ва Пекиннинг позицияси
Баёнот Мюнхен хавфсизлик конференцияси доирасида Хитой ташқи ишлар вазири Ван И ва Украина ташқи ишлар вазири Андрей Сибиганинг учрашувидан сўнг янгради. Учрашувда Пекин Россия зарбалари оқибатларини юмшатиш учун Украина энергетика инфратузилмасига инсонпарварлик ёрдами кўрсатишга ваъда берган.
Пекин расмийлари Хитой инқирозни сиёсий йўл билан ҳал этиш тарафдори эканини, ҳеч қайси томонни қўлламаётганини таъкидлаб келади. Улар Москвага ўлдирувчи қуроллар етказиб бергани ҳақидаги айбловларни ҳам рад этган.
Вашингтон қараши ва стратегик боғлиқлик
Шунга қарамай, Вашингтонда Хитой Россиянинг асосий ташқи ёрдамчиси сифатида кўрилмоқда. «Fox News» маълумотига кўра, Хитой тўғридан-тўғри қурол етказиб бермаса-да, Россия дронлар ва ҳарбий техника учун зарур эҳтиёт қисмлар борасида Пекинга қарам бўлиб қолган.
