Пеленинг афсонавий футболкаси сотувга қўйилади
Футбол тарихидаги энг машҳур либослардан бири Жаҳон чемпионати вақтида кимошди савдосига чиқарилмоқда.
1958 йилги Жаҳон чемпионати финалида бразилиялик афсона Пеле кийган футболка «Sotheby’s» кимошди савдосида сотувга чиқарилади. Савдо 29 июндан 16 июлгача давом этади ва мутахассислар лот қийматини 6 миллион долларга баҳоламоқда. Бу ҳақда ESPN нашри хабар берди.
Гап 17 ёшли Эдсон Арантис ду Насименту — Пеле Швецияга қарши финал баҳсида кийган 10-рақамли футболка ҳақида кетмоқда. Ўша учрашувда Бразилия рақибини 5:2 ҳисобида мағлуб этиб, ўз тарихидаги илк жаҳон чемпионлигига эришган.
Пеле мазкур баҳсда дубл қайд этган ва ҳозиргача Жаҳон чемпионати финалида гол урган энг ёш футболчи сифатида тарихда қолмоқда.
Нодир спорт мероси
«Sotheby’s»нинг замонавий коллекция буюмлари бўлими раҳбари Брам Вахтернинг таъкидлашича, бу либос футбол тарихидаги энг буюк ўйинчилардан бирининг юлдузга айланиш даври бошланган кечада кийилган.
Маълум қилинишича, финалдан кейин Пеле ушбу футболкани ўзининг жамоадоши ва яқин дўсти Дидага совға қилган. Кейинчалик у Бразилиядаги музей коллекциясига ўтган ва сўнг амалдаги эгаси томонидан сотиб олинган.
Кимошди савдоси Жаҳон чемпионати пайтида ўтказилади. Савдоларлар турнир финалига уч кун қолганда якунланади.
Пеле 2022 йилнинг декабр ойида 82 ёшида саратон касаллиги оқибатида вафот этган.
2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади.
