Қуролланган кишилар Путиннинг қизига алоқадор ташкилотни қидириб, Москва газетаси биносига бостириб кирди
Улар Россия Президентининг кенжа қизи Катерина Тихонованинг тузилмаларига алоқадор бўлган нотижорат ташкилотни излашган.
Москвада ниқобланган ва болғалар билан қуролланган шахслар «Московский комсомолец» газетаси биносига бостириб кирди. Улар Россия президенти Владимир Путиннинг қизига алоқадор бўлган нотижорат ташкилотини излашган. Бу ҳақда нашрнинг бош молиявий директори Екатерина Черешникова маълум қилди.
Унинг сўзларига кўра, ҳарбий кийимдаги ушбу шахслар 19 май куни идорага кириб келган, ўзларини таништирмаган ва у ерда бўлишлари сабабини тушунтиришдан бош тортишган.
Қуролланган шахслар бинонинг учинчи қаватига кўтарилиб, «Тиббий технологиялар консорциуми» автоном нотижорат ташкилоти ижарага олган хоналарни қидиришган. Босқинчилар «Московский комсомолец» журналистларига Россия Ички ишлар вазирлигининг Москва бўйича бош бошқармаси, Россия Тергов қўмитаси ёки Федерал хавфсизлик хизматига (ФСБ) мурожаат қилишни буюришган. Бироқ ушбу идораларнинг ҳеч бири ўз ходимлари газета биносида тергов ҳаракатлари олиб бораётганини тасдиқламади.
«Агентство» мустақил суриштирув нашрининг ёзишича, ушбу ташкилот 2020 йилда Россия Саноат ва савдо вазирлиги ташаббуси билан коронавирус пандемиясига жавобан тиббий ускуналар ишлаб чиқаришни маҳаллийлаштириш мақсадида тузилган. Нотижорат ташкилот таркибига 240 дан ортиқ аъзо гуруҳлар, жумладан, мудофаа саноати корхоналари киради. Консорциум асосчиларидан бири Россиянинг «Ростех» давлат мудофаа конгломерати таркибига кирувчи «Швабе» оптика холдинги ҳисобланади.
«Т-Инвариант» мустақил илмий нашрининг хабар беришича, Тиббий технологиялар консорциуми Владимир Путиннинг кенжа қизи Катерина Тихонованинг «Иннопрактика» жамғармаси томонидан ташкил этилган «Инновацион муҳандислик маркази» компанияси билан ҳамкорлик қилган.
Автоном нотижорат ташкилот, Инновацион муҳандислик маркази ва Сеченов университети Россия тиббиёт саноатида технологик етакчиликка эришиш учун тиббий-технологик саноат кластерини ташкил этган. Кластер бўйича келишув 2025 йилда Санкт-Петербург халқаро иқтисодий форумида (СПИЭФ) имзоланган.
Ушбу ташкилотга илгари Россия Мудофаа вазирлиги тизимида хизмат қилган, Радиациявий, кимёвий ва биологик муҳофаза ҳарбий академияси ҳамда Москва давлат университети битирувчиси, россиялик биолог ва Россия фанлар академияси профессори Виктор Назаров раҳбарлик қилган. Ҳозирда консорциумга илгари «Росмолодеж» (Россия ёшлар ишлари бўйича федерал агентлиги)да ишлаган Кирилл Литвицкий раҳбарлик қилмоқда.
