Рекорд даражада олтин қазиб олиш, Мубашшир Аҳмадга 7 йиллик жазо ва янги ГЭС — 18 сентябр дайжести

Мубашшир Аҳмадга 7 йиллик жазо сўралди Бугун, 18 сентябр куни Мубашшир Аҳмад тахаллуси билан танилган диний уламо Алишер Турсунов суд мажлиси бўлиб ўтди. Унда давлат айбловчиси — прокурор Алишер Турсуновга (Мубашшир Аҳмад) нисбатан 7 йил муддатга озодликдан маҳрум этиш жазосини сўради. Бу ҳақда Vaqt.uz журналисти хабар берди. «Адвокатлар жамоаси эса айбловлар асоссизлиги, Турсунов беайблигини исботлашга қаттиқ ҳаракат қилишди», — деди журналист. Мубашшир Аҳмадга сўнгги сўз 22 сентябр куни берилади. Шундан кейин суд маслаҳатга киради. «Guangzhou» клиникаси иши бўйича хитойлик ота-ўғил жаримага тортилди Тошкентда «Guangzhou Medical of China» клиникасида фирибгарлик ва сифатсиз дори воситаларини тарқатишда айбланган хитойлик шифокор Хе Кианг ва унинг ўғли Хе Фенг суд қилинди. Улар 100 нафар фуқарони алдаб, катта миқдордаги маблағларни қўлга киритган. Судда Хе Кианг айбини тан олган ва жабрланувчиларга етказилган зарарнинг қисман қопланганини айтган. Бектемир туман суди уларни катта миқдордаги жарима билан жазолашга қарор қилди: Хе Кианг 33,2 млн сўм, Хе Фенг эса 30,2 млн сўм миқдорида жаримага тортилди. Шунингдек, уларга нисбатан қамоқ эҳтиёт чораси бекор қилинди. Клиникага нисбатан жиноят иши 2022 йилда қўзғатилган бўлиб, беморларга арзон дориларни қимматбаҳо қилиб сотиш ҳолатлари мавжуд эди. Норин ГЭСлар кaскадининг дастлабки босқичи ишга тушди Наманган вилоятида Норин дарёсида қурилаётган гидроэлектр станциялари каскадининг биринчи босқичи ишга туширилди. 17 сентябр куни Президент Шавкат Мирзиёев Уйчи туманидаги иншоотни кўриб чиқди. Лойиҳа 428 миллион доллардан ортиқ маблағга амалга оширилади ва йилига 1 миллиард кВт/с электр энергияси ишлаб чиқаришни назарда тутади. Бу, шuningdek, 430 минг хонадонни электр билан таъминлайди ва 290 миллион куб метр газни тежаш имконини беради. Ишга туширилган ГЭС-1 маҳаллий материаллар ва ускуналар асосида қурилган ва «биринчи миллий ГЭС» сифатида қайд этилган. Унинг ишлаб чиқариш қуввати йилига 171 миллион кВт/с. Лойиҳа доирасида янги гидроагрегатлар жорий қилинди, бу эса миллий гидроэнергетика соҳасида янги босқич ҳисобланади. ГЭС ҳудудида сув тўсиш иншооти ва экологик манзаралар учун дарахтлар экиш чоралари кўрилган. Қолган станциялар 2026-2027 йилларида ишга туширилади.   Ўзбекистон энг кўп олтин қазиб олувчи давлатлар ўнталигига кирди Анъанага кўра, Хитой энг йирик ишлаб чиқарувчи давлат сифатида биринчи ўринни эгаллади. Ундан кейин Россия ва Австралия жойлашган. Канада ҳамда АҚШ кучли бешликка кирган.  Ўзбекистон эса илк бор энг кўп олтин қазиб олувчи ўнта давлат қаторига кирди. Бу мамлакатнинг глобал олтин бозоридаги нуфузи ва таъсири ортиб бораётганини англатади. Мутасаддилар таъкидлашича, олтин қазиб олиш анъанавий равишда Ўзбекистоннинг экспорт салоҳиятида асосий йўналиш бўлиб келган. Йирик ишлаб чиқарувчилар қаторига кириш эса иқтисодий барқарорликни мустаҳкамлаш, молия секторини ривожлантириш ва хорижий сармояларни жалб қилиш учун янги имкониятлар очиши кутилмоқда. Ўзбекистон маҳсулотлари учун Африка бозорларига йўл очилмоқда Ўзбекистон дипломатлари Миср–Африка тадбиркорлари уюшмаси (ЕАВА) билан савдо-иқтисодий алоқаларни ривожлантириш мақсадида музокара ўтказди. Мулоқотда Ўзбекистон ва Африка давлатлари ўртасида савдо, саноат, қишлоқ хўжалиги, фармацевтика, тўқимачилик ва логистика соҳаларида қўшма лойиҳаларни амалга ошириш истиқболлари муҳокама қилинди. Томонлар, шунингдек, ўзаро инвестиция ва экспорт салоҳиятини ошириш, тадбиркорлар ўртасида тўғридан-тўғри алоқаларни йўлга қўйишга келишиб олишди. EABA — Африканинг 20га яқин давлатида ўз ваколатхоналарини очган йирик уюшма бўлиб, унинг фаолияти савдо, инвестиция ва саноат кооперациясини кенгайтиришга қаратилган.