Россия Зеленскийни Москвага музокаралар учун таклиф қилди
Абу-Даби саммити фонида Юрий Ушаков Россия Зеленскийнинг музокарага келиши учун хавфсизлик ҳамда барча шароитларни таъминлашга тайёрлигини айтди.
Москва Президенти Владимир Путин ва Украина Президенти Воладимир Зеленскийнинг тўғридан-тўғри музокараларига тайёр. Бу ҳақда Россия Президенти ёрдамчиси Юрий Ушаков баёнот берди.
У Москва «бундай мулоқотлардан» ҳеч қачон воз кечмаганини, агар улар яхши тайёрланган ва аниқ натижаларга эришишга қаратилган бўлса, бунга тайёрлигини таъкидлади.
Таклиф
Ушаковнинг айтишича, агар Зеленский учрашувга «ҳақиқатан ҳам тайёр» бўлса, Россия томони уни Москвага таклиф қилади.
«Бунда унинг хавфсизлиги ва ишлаши учун зарур шароитлар кафолатланган ҳолда таъминланади», - деди РФ Президенти ёрдамчиси.
Абу-Даби музокаралари
Путин ва Зеленскийнинг эҳтимолий учрашуви 23-24 январ кунлари Абу-Дабида бўлиб ўтган ҳамда барча уч делегация томонидан ижобий баҳоланган АҚШ, Россия ва Украина ўртасидаги уч томонлама музокаралардан сўнг муҳокама қилина бошланди. «Axios» нашри манбаси ўшанда томонлар «Путин ва Зеленский учрашувига жуда яқин» эканини хабар қилган эди.
2025 йил кузида Путин интервюларидан бирида Зеленскийга музокаралар учун Москвага келишни таклиф қилган эди. Ўшанда Зеленский РФ Президентининг ўзи Киевга келиши мумкинлигини айтиб, таклифни рад этганди.
