Садир Жапаров давлат қарзи ЙИМнинг 50 фоизидан ошишига йўл қўймасликни буюрди

Қирғизистон президенти Садир Жапаров ҳукуматга мамлакат давлат қарзини ЙИМнинг 50 фоизидан оширмаслик вазифасини юклади. Бу ҳақда «24.kg» хабар берди.

Унинг таъкидлашича, 2020-йилгача Қирғизистон ташқи қарзи ЙИМнинг қарийб 120 фоизига етган эди. Ҳозир эса мамлакатнинг умумий давлат мажбуриятлари ЙИМнинг 39 фоизигача қисқарган.

Президент сўзларига кўра, давлат қарзини хавфсиз даражада ушлаб туриш иқтисодиёт барқарорлигини таъминлаш ва бюджетга тушадиган қарз юкини камайтириш учун муҳим ҳисобланади.

Жапаровнинг таъкидлашича, дунёда давлат қарзи ЙИМнинг 100 фоизидан ошиб кетган кўплаб мамлакатлар бор, бироқ бундай модель Қирғизистон учун мос эмас. Унинг айтишича, мамлакат учун асосий вазифа — хавфлардан қочиш ва барқарор иқтисодий ривожланиш суръатларини сақлаб қолиш.

Президентнинг маълум қилишича, ҳукуматга берилган топшириқ узоқ муддатда молиявий тизимни мустаҳкамлаш ва қарз олиш билан иқтисодий ўсиш ўртасидаги мувозанатни сақлашга қаратилган. Жапаровнинг фикрича, бу ёндашув бюджетни ортиқча қарз юкисиз режалаштириш имконини беради.

Президент жалб қилинаётган маблағлардан фойдаланиш тамойилларига ҳам алоҳида тўхталди. Унинг сўзларига кўра, ҳозир ҳар бир кредит аниқ лойиҳаларга йўналтирилмоқда ва тўлиқ назоратдан ўтказилмоқда.

Жапаровнинг айтишича, бундай маблағлар иқтисодий самара яратади ва келажакда ўзини ўзи қоплаши керак.

Сўнгги йилларда қарз юкининг камайиши Қирғизистон молиявий сиёсатининг асосий йўналишларидан бирига айланди. Давлат қарзининг ЙИМга нисбатан қарийб 120 фоиздан 39 фоизгача камайиши қарз олиш шартларини қайта кўриб чиқиш ва бюджет интизомини кучайтириш билан изоҳланмоқда. Бу чоралар мамлакатнинг ташқи кредиторларга қарамлигини камайтириш ва харажатлар тизимини барқарорлаштиришга ёрдам берди.

Шу билан бирга, ҳукумат иқтисодий ривожланишга хизмат қиладиган, инфратузилмани яхшилайдиган ва мамлакат салоҳиятини оширадиган лойиҳалар учун молиялаштириш жалб қилишда давом этишини таъкидламоқда.

Давлат қарзини ЙИМнинг 50 фоизидан паст даражада ушлаб туриш қарз олиш харажатлари ошиб кетиши эҳтимолини камайтиради ва бюджет учун хавфларни пасайтиради. Халқаро тажриба шуни кўрсатадики, давлат қарзи ЙИМнинг 60 фоизидан ошганда, кўпинча қарзларни тўлаш ва уларга хизмат кўрсатиш харажатлари ортади. Қирғизистон давлат қарзи таркибида катта қисми узоқ муддатли ва белгиланган фоиз ставкаларига эга кредитлардан иборат. Бу эса молиявий кўрсаткичларни барқарор сақлашга ёрдам беради. Бундай шартлар давлат бюджетига тушадиган босимни камайтириб, молиявий барқарорликни таъминлаш имконини беради.

Эслатиб ўтамиз, аввалроқ Қирғизистон ялпи ички маҳсулоти қарийб 12 фоизга ўсгани ҳақида ёзган эдик.