«Сурхон-Агро» эркин иқтисодий зонаси ташкил этилади
Аҳолини куз-қиш мавсумларида қишлоқ хўжалиги маҳсулотлари билан узлуксиз таъминлаш мақсадида иссиқхоналарга имтиёз берилди.
2026 йил 25 март куни қабул қилинган ПҚ–108-сонли президент қарорига мувофиқ, 2026–2027 йилларда республикада иссиқхоналар фаолиятини кенгайтириш ва самарадорлигини ошириш бўйича асосий мақсадли кўрсаткичлар тасдиқланди. Ушбу чоралар озиқ-овқат хавфсизлигини таъминлашда муҳим аҳамият касб этади.
Хусусан, Сурхондарё вилояти Шеробод туманида камида 940 гектар майдонда замонавий иссиқхона мажмуаларини ташкил этиш режалаштирилган. Бу орқали йил давомида сабзавот ва бошқа қишлоқ хўжалиги маҳсулотлари етиштириш ҳажмини ошириш кўзда тутилмоқда.
Шу билан бирга, энергия тежамкор ва муқобил энергия манбаларига асосланган иситиш тизимлари улушини камида 50 фоизга етказиш вазифаси қўйилган. Атмосфера ҳавосига зарарли ташламалар чиқараётган тадбиркорлик субъектлари фаолиятини босқичма-босқич қисқартириш ҳам режалаштирилган.
«Сурхон-Агро» иқтисодий зонасига бериладиган имтиёзлар
Қарорга мувофиқ, Сурхондарё вилоятида «Сурхон-Агро» эркин иқтисодий зонаси ташкил этилади. Ушбу ҳудудда фаолият юритувчи иссиқхона хўжаликлари учун қатор имтиёз ва преференциялар тақдим этилади.
Жумладан, ер участкалари электрон онлайн аукцион орқали ижарага берилганда 5 йил давомида ижара тўловининг нол ставкаси жорий қилинади. Шунингдек, иссиқхоналарни суғориш ва технологик жараёнларда ишлатиладиган оқова ҳамда ерости сувлари учун тўловлардан 3 йил муддатга озод этиш белгиланган.
Бундан ташқари, аномал совуқ об-ҳаво шароитларида белгиланган экологик талабларга риоя қилган ҳолда кўмир ёқишга истисно тариқасида рухсат берилади. Мазкур чора-тадбирлар мамлакатда озиқ-овқат маҳсулотлари ишлаб чиқариш ҳажмини ошириш ва аҳолини барқарор таъминлашга хизмат қилиши кутилмоқда.
