Тақиқдаги уйларга пропискага ўтишга рухсат берилади, лекин бир шарт билан
Ўзбекистонда 2027 йилдан кўчмас мулкни рўйхатдан ўтказмаганлик учун жарима бекор қилинади. Мерос уйларни сотишда солиқ имтиёзлари ва тақиқдаги уйларга пропискага қўйиш бўйича янги тартиблар тасдиқланди.
© Ijtimoiy tarmoqlarЎзбекистонда кўчмас мулкни вақтида рўйхатдан ўтказмаганлик учун маъмурий жарималар бекор қилинади ҳамда гаровдаги уйларга пропискага қўйиш тартиби енгиллаштирилади. Бу ҳақда Ўзбекистон Республикаси Президентининг 15 июлдаги қарорида маълум қилинди.
Ҳужжатга мувофиқ, Адлия вазирлиги ҳамда Кадастр агентлигининг таклифига кўра, 2027 йил 1 январдан бошлаб кўчмас мулкка бўлган ҳуқуқни ўз вақтида давлат рўйхатидан ўтказмаганлик учун маъмурий жарима солиш тизими бекор қилинади. Бунинг ўрнига кечиктирилган муддатдан келиб чиқиб рўйхатдан ўтказиш учун оширилган ставкада тўлов ундириладиган тизим жорий этилади. Бунда оширилган ставкаларда тўлов ундиришнинг энг кўп миқдори белгиланган маъмурий жарима миқдоридан ошиб кетмаслиги таъминланади.
Солиқ имтиёзи ва пропискадаги енгилликлар
Шунингдек, солиқ тўловчига хусусий мулк ҳуқуқи асосида тегишли бўлган турар жой мерос тартибида ёки яқин қариндошидан ҳадя сифатида олинган бўлса, уни сотишдан олинган даромадга солиқ солинмаслиги учун белгиланган муддат энди васият қилувчи ёки ҳадя қилувчининг мазкур турар жойга бўлган мулк ҳуқуқи давлат рўйхатидан ўтказилган санадан бошлаб ҳисобланиши белгиланди.
Бундан ташқари, қарорга асосан гаровга қўйилган ёки хатловда (тақиқда) бўлган турар жойга гаровга олувчининг розилигисиз яшаш ва турган жойи бўйича рўйхатдан ўтишга рухсат берилади. Бунинг учун рўйхатдан ўтказилаётган шахс мулкдорнинг, гаровга олувчининг ёки тақиқни қўйишга масъул органнинг ички ишлар органларига қилган мурожаати асосида унинг рўйхатдан ўтказилганлиги бекор қилинишига аввалдан розилик бериши зарур бўлади.
