Тибетда дунёдаги энг баланд қуёш станцияси қурилмоқда

Хитойнинг Ситсзан (Тибет) автоном ҳудудида 2026 йил 6 апрелдан йирик қуёш энергетикаси лойиҳаси амалга оширилмоқда. Мазкур ташаббус қайта тикланувчи энергия манбаларини барқарорлаштириш ва энергия таъминотини яхшилашга қаратилган.

Лойиҳа Дангсюн туманида, денгиз сатҳидан 4550 метр баландликда қурилмоқда. Бу эса уни дунёдаги энг баланд жойлашган минорали қуёш иссиқлик электр станциясига айлантиради. Юқори баландликда жойлашиши унинг техник ва муҳандислик жиҳатдан мураккаблигини оширади.

Станция қандай ишлайди?

Станция оддий фотоэлектрик панеллардан фарқли равишда ишлайди. Унда кўп сонли ойналар орқали қуёш нурлари бир нуқтага жамланиб, иссиқлик энергияси ҳосил қилинади. Бу иссиқлик махсус мой ва эритилган туз ёрдамида сақланади ва электр энергиясига айлантирилади.

Ушбу технология туфайли станция қуёш ботгандан кейин ҳам 6 соатгача ишлаш имкониятига эга бўлади. Бу эса энергия таъминоти барқарорлигини оширишда муҳим омил ҳисобланади.

Қурилиш жараёни мураккаб табиий шароитларда амалга оширилмоқда. Баландлик, сийрак ҳаво ва кескин ҳарорат ишчилар учун қийинчилик туғдирмоқда. Шу боис, улар учун махсус яшаш ва иш шароитлари ташкил этилган.

Экологик мослашувчан

Лойиҳанинг яна бир жиҳати — экологик мослашувчанлигидир. Станция ҳудудида жойлашган панеллар остида чорва моллари эркин ҳаракатлана олади, бу эса ердан самарали фойдаланиш имконини беради.

Маълум қилинишича, объект 2027 йилда ишга туширилади. У йиллик 719 млн kV/h электр энергияси ишлаб чиқариб, атмосферага чиқиндиларни сезиларли даражада камайтиришга хизмат қилади.