Томи қулаган метро бекати, 48 даражагача кутилаётган жазирама ва чала уйга одам кўчирганлар учун қамоқ жазоси — 16 июл дайжести

Фойдаланишга топширилмаган уйга одам кўчирганлар 3 йилгача озодликдан маҳрум қилиниши мумкин

Қонунчилик палатаси фойдаланишга расман қабул қилинмаган кўп қаватли уйларга аҳолини кўчириб киритганлик учун тўғридан-тўғри жиноий жавобгарлик жорий этишни маъқуллади. Қонун лойиҳасига кўра, бундай ҳолатга йўл қўйган буюртмачи ёки пудратчига 3 йилгача ахлоқ тузатиш ишлари, 2–3 йилгача озодликни чеклаш ёки 3 йилгача озодликдан маҳрум қилиш жазоси қўлланилиши мумкин.

Бош прокуратура маълумотларига кўра, сўнгги 7 йилда шаҳарсозлик талабларига риоя қилинмасдан қурилган 383 та кўп қаватли уйдаги 20 мингдан ортиқ хонадон сотилган. Шунингдек, ҳали фойдаланишга топширилмаган 136 та уйда 8 мингдан зиёд аҳоли яшаётгани аниқланган. Мавжуд маъмурий жазолар кутилган самарани бермагани учун қонунчиликни кучайтириш таклиф этилган.

«Infinbank»нинг асосий акциядори Фарҳод Мамажонов Perfectum'нинг 50 фоиз улушини сотиб олади

Рақобат қўмитаси тадбиркор, «Infinbank»нинг асосий акциядори Фарҳод Мамажонов томонидан Perfectum мобил операторига эгалик қилувчи «Rubicon Wireless Communication» МЧЖнинг 50 фоиз улушини сотиб олиш бўйича иқтисодий концентрация битимига розилик берди. Қўмита таҳлилларига кўра, ушбу битим бозордаги рақобат муҳитига салбий таъсир кўрсатмайди.

Фарҳод Мамажонов «Infinbank»нинг 44,67 фоиз акциясига эгалик қилади. Шунингдек, у «Uztex Tashkent», «Azia Trans Terminal», «Rakat Plaza», «Sofa Marva Tour» каби қатор компанияларда ҳам улушга эга. Жорий йил май ойида эса у «Safo Airlines» авиакомпаниясини ташкил этган эди. Рақобат қўмитаси қарори кучга киргач, тадбиркор Perfectum мобил операторининг ярим улушига эга бўлиши мумкин.

Ўзгидромет ҳарорат янада кўтарилишидан огоҳлантирди

18−20-июл кунлари Ўзбекистонга жанубдан жуда иссиқ ҳаво оқими кириб келиши давом этади, деб хабар берди Ўзгидромет.

Маълум қилинишича, ҳудудларда иссиқ +43...+45 даражагача, жанубда ва чўл ҳудудларда баъзи жойларда +46...+48 даражагача кўтарилиши кутилмоқда.

Шунингдек, республика бўйича шамол тезлиги секундига 13-18 метргача, баъзида 20-22 метргача кучайиши, айрим жойларда чанг-тўзонлар билан кузатилиши кутилмоқда.

Ўзбекистон 4,2 миллион тонна буғдой сотиб олиши керак — FAO

БМТнинг Озиқ-овқат ва қишлоқ хўжалиги ташкилоти (FAO) прогнозига кўра, 2026–2027 маркетинг йилида Ўзбекистон четдан 4,2 миллион тонна буғдой ва ун импорт қилишига тўғри келади. Бу мамлакатда буғдойга бўлган ички талабнинг юқорилиги ҳамда ун ишлаб чиқариш қувватларининг кенгайиши билан изоҳланмоқда. Шу билан бирга, жорий йилда дон ҳосили яхши бўлиши кутилмоқда — умумий ишлаб чиқариш ҳажми 9 миллион тонна, шундан 7,3 миллион тоннаси буғдой ҳиссасига тўғри келиши прогноз қилинган.

FAO маълумотларига кўра, сўнгги ўн йилда Ўзбекистоннинг буғдой уни импорти қарийб 70 фоизга ошган. Асосий импорт Қозоғистондан келтирилаётган юқори сифатли буғдой ҳисобига таъминланмоқда. Шу билан бирга, мамлакатда инфляция 2026 йил май ойида 5,5 фоизгача пасайган бўлса-да, биринчи навли буғдой уни нархлари ҳали ҳам ўтган йилги даражадан юқори бўлиб қолмоқда. Бунга ишлаб чиқариш харажатлари ва импорт қилинадиган буғдой нархининг қимматлашгани асосий омил сифатида кўрсатилган.

«Турон» метро бекати томининг бир қисми қулаб тушди

Тошкент метрополитенининг «Ер усти ҳалқа» йўналишидаги «Турон» метро бекатида том конструкциясининг бир қисми силжиб тушди. Ҳодиса 16 июль куни соат 14:34 да содир бўлган бўлиб, оқибатда икки нафар йўловчи енгил тан жароҳати олган. Уларга воқеа жойида биринчи тиббий ёрдам кўрсатилган.

Ҳодисадан сўнг ҳаракат хавфсизлигини таъминлаш мақсадида мазкур бекат орқали поездлар ҳаракати вақтинча тўхтатилди. «Тошкент метрополитени» маълум қилишича, ҳозирда мутахассислар томонидан техник ўрганиш ишлари олиб борилмоқда ва аниқланган камчиликларни бартараф этиш чоралари кўрилмоқда. Шунингдек, йўловчилар учун «Қипчоқ» ва «Қурувчилар» метро бекатлари ўртасида бепул метробуслар ҳаракати ташкил этилди.