«Toyota» Япониянинг энг қиммат компанияси мақомини йўқотди

Япониянинг йирик автомобил ишлаб чиқарувчиси «Toyota Motor Corporation» мамлакатдаги энг қиммат компания мақомини йўқотди. 1-июн ҳолатига кўра, бозор капитализацияси бўйича уни технологик холдинг «SoftBank Group» ортда қолдирди, деб хабар берди «Financial Times».

«Toyota» ўрнини ким эгаллади?

«Toyota» Япония фонд бозорида энг қиммат компания мақомини йигирма йилдан зиёд вақт давомида сақлаб келган эди. Компания бу етакчиликни 2003-йилда қўлга киритган ва ўшанда телекоммуникация гиганти «NTT Docomo»ни ортда қолдирган.

Бироқ 1-июн кунги савдоларда «Toyota» акциялари қарийб 4,5 фоизга арзонлашди. Натижада компаниянинг бозор капитализацияси 46 триллион иенадан пастга тушиб, тахминан 288 миллиард долларни ташкил қилди.
Шу билан бир вақтда «SoftBank» акциялари 13 фоиздан ортиқ қимматлашди. Бу компаниянинг бозор қийматини 48 триллион иенага, яъни тахминан 301 миллиард долларга етказди.

«SoftBank» «Toyota»ни капитализация бўйича охирги марта 2000-йилда, дотком бумининг энг қизғин даврида ортда қолдирган эди.

Инвесторлар нима демоқда?

Инвесторлар «SoftBank» акцияларининг ҳозирги ўсишини асосан сунъий интеллект соҳасига бўлган қизиқишнинг кескин ортиши билан изоҳламоқда.

Компания Британиянинг чип ишлаб чиқариш технологияларини яратувчи «Arm Holdings» компаниясининг тахминан 90 фоиз улушига эгалик қилади. Шунингдек, у «OpenAI»нинг йирик инвесторларидан бири ҳисобланади ҳамда АҚШ ва Европадаги йирик дата-марказлар қурилишини молиялаштириш лойиҳаларида иштирок этмоқда.
2026-йил бошидан буён «SoftBank» акциялари қарийб 73 фоизга қимматлашган.

Японияда СИ бумидан кимлар ютиб чиқмоқда?

Сунъий интеллект атрофидаги бум Япониянинг бошқа технологик компанияларига ҳам ижобий таъсир кўрсатмоқда.

Хусусан, хотира микросхемалари ишлаб чиқарувчиси «Kioxia Holdings» акциялари йил бошидан буён 525 фоиздан ортиқ ўсди. Бу компания Япониянинг энг қиммат компаниялари рейтингида учинчи ўринга кўтарилиб, «Mitsubishi UFJ» «Financial Group»ни ортда қолдирди.