Трамп барча импорт маҳсулотларига 10 фоизлик глобал бож жорий қилди

АҚШ президенти Доналд Трамп барча мамлакатларга нисбатан 10 фоизлик глобал савдо божи жорий этилганини эълон қилди.

Трампга кўра, мазкур қарор 150 кун давомида амал қилади ва амалдаги тарифларга қўшимча тарзда қўлланади.

Президентнинг баёнотига кўра, фармон 1974 йилда қабул қилинган Савдо тўғрисидаги қонун асосида имзоланган. Ушбу қонун давлат раҳбарига тўлов баланси билан боғлиқ йирик ва жиддий муаммолар мавжуд бўлганда 15 фоизгача божларни 150 кунгача жорий этиш ваколатини беради. Қонун доирасида алоҳида тергов ёки қўшимча процессуал талаблар назарда тутилмаган.

Трамп ўзининг Truth Social ижтимоий тармоғида: «Оқ уй Овал кабинетидан туриб бутун дунё мамлакатларига нисбатан деярли дарҳол кучга кирадиган 10 фоизлик глобал савдо божларини имзолаш мен учун катта шараф», — деб ёзган

Президент сўзларига кўра, айрим давлатлар йиллар давомида АҚШдан иқтисодий устунликка эришиб келган ва тарифлар бекор қилинганидан мамнун бўлган. «Бу ҳолат узоқ давом этмайди»,— дея таъкидлаган у.

Шу билан бирга, Трамп мамлакат Олий судининг тарифлар бўйича қарори унда норозилик уйғотганини билдирган. У айрим судьяларни мамлакат манфаатларини ҳимоя қилишда етарли қатъият кўрсатмаганликда танқид қилган.

Эслатиб ўтамиз, аввалроқ Америка Қўшма Штатлари Олий суди президент Доналд Трамп томонидан жорий этилган импорт божларини бекор қилиш ҳақида қарор чиқарганлиги ҳақида хабар берган эдик.