Трамп нефтдан кейин энди Венесуэла олтинини ҳам сотишга рухсат берди
Доналд Трамп АҚШ Венесуэладаги янги ҳукуматни расман тан олганини маълум қилди. Мамлакатдаги янги ҳукуматга президент вазифасини бажарувчи Делси Родригес раҳбарлик қилмоқда. Трамп ушбу ҳукумат билан олтин бўйича «тарихий» келишув тузилганини ҳам билдирган.
АҚШ президенти Доналд Трамп кеча, 7-март куни Флоридада Лотин Америкаси давлатлари раҳбарлари саммитида АҚШ Венесуэлада янги ҳукуматни расман тан олганини маълум қилди. Янги ҳукуматга мамлакат президенти вазифасини бажарувчи Делси Родригес раҳбарлик қилмоқда.
«Мен мамнунманки, бу ҳафтада АҚШ Венесуэла ҳукуматини расман тан олди. Шунингдек, биз олтин бўйича тарихий келишувга эришдик. Бу келишув мамлакатларимизга Венесуэла олтини ва бошқа фойдали қазилмаларини сотишда ҳамкорлик қилиш имконини беради. Уларда улкан олтин захиралари бор ва ерлари жуда яхши», – деди Оқ уй раҳбари.
6-март куни Вашингтон Венесуэла олтин ишлаб чиқариш соҳасига нисбатан санкцияларни юмшатди. АҚШ молия вазирлиги Америка компанияларига Венесуэла олтинини импорт қилиш, қайта ишлаш ва ундан маҳсулот ишлаб чиқариб сотишга рухсат берди.
Вашингтон ва Венесуэладаги янги ҳукумат
Йил бошида АҚШ Венесуэлада ҳарбий операция ўтказди. Мамлакат президенти Николас Мадуро 3-январь куни АҚШ махсус кучлари томонидан Каракасда ушлаб олинди ва АҚШга олиб кетилди. Шундан сўнг давлат раҳбарлиги вазифасини Делси Родригес ўз зиммасига олди, у олдинроқ вице-президент лавозимини эгаллаган эди. Родригес Вашингтон босими остида сиёсий махбусларни озод қилишни бошлади ва Венесуэла нефт секторини хорижий инвесторлар учун очиш мақсадида қазилмалар тўғрисидаги қонунларни ўзгартирди. 24-феврал куни Трамп АҚШ «янги дўсти ва ҳамкори» Венесуэладан тахминан 89 миллион баррел нефт олганини эълон қилди.
27-феврал куни Родригес Трампни мамлакатга қарши санкцияларни бекор қилиш ва Венесуэла нефтини блокдан чиқаришга чақирди. Президент вазифасини бажарувчи Мадуро ҳукумати ағдарилганига қарамай ушбу мамлакатларни бир-бирига «дўстона» деб ҳисоблашини таъкидлади. Унинг сўзларига кўра, Каракас ҳукумати Вашингтон билан «янги ҳамкорлик кун тартибини очиш»га интилади.
АҚШ давлат департаменти 5-март куни Венесуэла вақтинчалик ҳокимияти билан дипломатик алоқаларни тиклаш бўйича келишувга эришганини эълон қилди. Марко Рубио раҳбарлигидаги департамент АҚШ Венесуэла халқига тинч йўл билан демократик равишда сайланган ҳукуматга ўтишини таъминлайдиган «босқичма-босқич жараён» доирасида ёрдам беришда давом этади, деб ваъда берди.
